തിരുവനന്തപുരം: ഓപറേഷന്‍ ഒളിംപ്യ പദ്ധതിയിലേക്ക് ഫെന്‍സിങ് താരങ്ങളുടെ തിരഞ്ഞെടുപ്പ് 13ന് രാവിലെ ഒന്‍പത് മുതല്‍ തലശ്ശേരി സായ് സെന്ററില്‍ വച്ച് നടക്കും. തിരഞ്ഞെടുക്കപ്പെടുന്ന താരങ്ങള്‍ക്ക് രാജ്യത്തെയും വിദേശത്തെയും മികച്ച ഫെന്‍സിങ് കോച്ചുമാരുടെ പരിശീലനം ലഭ്യമാക്കും.
മികച്ച താമസം, ഭക്ഷണം വിദ്യാഭ്യാസം, ദേശീയ അന്തര്‍ദ്ദേശീയ മത്സരങ്ങളില്‍ പങ്കെടുക്കാനുള്ള സൗകര്യം എന്നിവയും ലഭിക്കും. 10നും 14 നും മധ്യേ പ്രായമുള്ളവര്‍, 14 വയസിന് മുകളില്‍ പ്രായമുള്ളവര്‍ എന്നീ രണ്ട് വിഭാഗങ്ങളിലായാണ് തിരഞ്ഞെടുപ്പ്. 10-14 വിഭാഗത്തില്‍ തുടക്കക്കാര്‍ക്കും പങ്കെടുക്കാം.
14 വയസിന് മുകളിലുള്ള വിഭാഗക്കാരുടെ സെലക്ഷന്‍ ട്രയല്‍സില്‍ പങ്കെടുക്കുന്നവര്‍ ഇന്റര്‍നാഷനല്‍ ഫെന്‍സിങ് ഫെഡറേഷന്‍ അംഗീകരിച്ചിട്ടുള്ള അന്തര്‍ദേശീയ ഫെന്‍സിങ് ചാംപ്യന്‍ഷിപ്പില്‍ മെഡല്‍ നേടിയവരോ, പങ്കെടുത്തിട്ടുള്ളവരോ, ദേശീയ വ്യക്തിഗത മത്സരങ്ങളില്‍ മെഡല്‍ നേടിയിട്ടുള്ളവരോ, ദേശീയ ചാംപ്യന്‍ഷിപ്പില്‍ വ്യക്തിഗത ഇനത്തില്‍ നാല് മുതല്‍ എട്ട് വരെ റാങ്കില്‍ ഉള്‍പ്പെട്ടവരോ, ദേശീയ ടീം ചാംപ്യന്‍ഷിപ്പില്‍ മെഡല്‍ നേടിയവരോ, ദേശീയ തലത്തില്‍ പങ്കെടുത്തിട്ടുള്ളവരോ, സംസ്ഥാന തലത്തില്‍ സ്വര്‍ണ മെഡല്‍ നേടിയവരോ ആയിരിക്കണം.
യോഗ്യതയുള്ളവരും, തിരഞ്ഞെടുപ്പില്‍ പങ്കെടുക്കുവാന്‍ താത്പര്യമുള്ളവരുമായ ഫെന്‍സിങ് താരങ്ങള്‍ വയസ് തെളിയിക്കുന്ന സര്‍ട്ടിഫിക്കറ്റ്, സംസ്ഥാന ദേശീയ അന്തര്‍ദേശീയ തലത്തിലുള്ള ഫെന്‍സിങ് സര്‍ട്ടിഫിക്കറ്റുകള്‍, ആവശ്യമായ കളി ഉപകരണങ്ങള്‍ എന്നിവ സഹിതം 13ന് രാവിലെ എട്ടിന് തലശ്ശേരി സായ് സെന്ററില്‍ എത്തണം. 2020, 24, 28 ഒളിംപിക്‌സ് മത്സരങ്ങളില്‍ കായിക താരങ്ങളെ മെഡല്‍ നേടുന്നതിന് സജ്ജരാക്കാനായി സ്‌പോര്‍ട്‌സ് കൗണ്‍സിലും സംസ്ഥാന സര്‍ക്കാരും സംയുക്തമായി ആവിഷ്‌ക്കരിച്ചിട്ടുള്ള പദ്ധതിയാണ് ഓപറേഷന്‍ ഒളിംപ്യ.