കോഴിക്കോട്: അതിരപ്പിള്ളി ജല വൈദ്യുതപദ്ധതി നടപ്പാവില്ലെന്ന് സി.പി.ഐ ദേശീയ എക്‌സിക്യുട്ടീവ് അംഗം ബിനോയ് വിശ്വം. കേരളത്തിന്റെ ഊര്‍ജാവശ്യങ്ങള്‍ക്ക് ഒരുതരത്തിലും നല്ലതല്ലാത്ത പദ്ധതിയാണിതെന്ന് അദ്ദേഹം മാധ്യമപ്രവര്‍ത്തകരോട് പറഞ്ഞു. ലോകത്തെവിടെയും ഇത്തരം പദ്ധതി വിജയം കണ്ടിട്ടില്ല. പലയിടത്തും ഇത്തരം വന്‍കിട പദ്ധതികള്‍ ഉപേക്ഷിക്കുകയാണ്. 1982ലെ കണക്കിനെ അടിസ്ഥാനമാക്കി 2017ലെ ജലത്തിന്റെ ലഭ്യത മനസിലാക്കാനോ സമവായമുണ്ടാക്കി പദ്ധതി മുന്നോട്ടു കൊണ്ടുപോകാനോ ആവില്ല. ഈ പദ്ധതി വേണ്ടെന്നാണ് അഭിപ്രായം. ബന്ധപ്പെട്ടവര്‍ ജനവികാരം മാനിച്ച് മുന്നോട്ടുപോകുമെന്നാണ് പ്രതീക്ഷിക്കുന്നതെന്നും അദ്ദേഹം പറഞ്ഞു.