കൊല്ലം: സ്ത്രീകള്‍ കുളിക്കുന്ന ദൃശ്യങ്ങള്‍ മൊബൈലില്‍ പകര്‍ത്തുന്നതു പതിവാക്കിയ യുവാവ് പിടിയില്‍.  പതിനെട്ടുകാരനെയാണു കഴിഞ്ഞ ദിവസം വൈകിട്ട് നഗരത്തിനു സമീപത്തെ ഒരു വീട്ടില്‍ നിന്ന് പിടികൂടിയത്. പെണ്‍കുട്ടി കുളിക്കുന്നതിനിടെ കുളിമുറിയുടെ വെന്റിലേറ്ററിലൂടെ മൊബൈല്‍ ഫോണ്‍ ഉപയോഗിച്ച് ദൃശ്യങ്ങള്‍ ചിത്രീകരിക്കുന്നതിനിടെയാണ് പിടിയിലായത്.  പെണ്‍കുട്ടി ബഹളം വച്ചതോടെ വീട്ടുകാരും പരിസരവാസികളും ചേര്‍ന്ന് യുവാവിനെ കൈയോടെ പിടികൂടി ഇരവിപുരം പൊലിസില്‍ ഏല്‍പ്പിച്ചു. കുളിമുറിയില്‍ എത്തി നോക്കിയതിന് കേസെടുത്താല്‍ മതിയെന്ന നിലപാടിലായിരുന്നു വീട്ടുകാര്‍. പ്രതിയെ കസ്റ്റഡിയിലെടുത്ത പൊലിസ് ചോദ്യം ചെയ്തപ്പോള്‍ വേറെ നാല് വീടുകളില്‍ നിന്ന് ഇത്തരം ദൃശ്യങ്ങള്‍ പകര്‍ത്തിയതായി യുവാവ് സമ്മതിച്ചു. കുളിസീനുകള്‍ ചിത്രീകരിച്ച ഏകദേശം ഇരുന്നൂറോളം വീഡിയോ ക്ലിപ്പുകള്‍ തന്റെ മൊബൈല്‍ ഫോണില്‍ ഉണ്ടെന്നും യുവാവ് പൊലിസിനോട് സമ്മതിച്ചു. തുടര്‍ന്ന് ഇയാളുടെ വീട്ടില്‍ നിന്ന് ലാപ്പ്‌ടോപ്പ് പിടിച്ചെടുത്ത് പരിശോധിച്ചെങ്കിലും ഇത്തരം ദൃശ്യങ്ങള്‍ കണ്ടെടുക്കാന്‍ കഴിഞ്ഞില്ല.  യുവാവിന്റെ മൊബൈലില്‍ നിന്നുള്ള ചിത്രങ്ങള്‍ സുഹൃത്തുക്കളുടെ ഫോണിലേക്ക് പോയിട്ടുണ്ടോയെന്നറിയാന്‍ സുഹൃത്തുക്കളെ ചോദ്യം ചെയ്യുമെന്ന് പൊലിസ് പറഞ്ഞു.