ന്യൂഡല്‍ഹി: ജനാധിപത്യത്തിന്റെ അടിത്തറയിളക്കുന്ന സംഘ്പരിവാര്‍ രാഷ്ട്രീയത്തിനെതിരേയുള്ള പോരാട്ടം വിജയത്തിലെത്തുമെന്നും രാജ്യത്തിന്റെ മതനിരപേക്ഷ പാരമ്പര്യം വീണ്ടെടുക്കാന്‍ രാഷ്ട്രീയ പ്രവര്‍ത്തകരും എഴുത്തുകാരും മാധ്യമ പ്രവര്‍ത്തകരും ഉള്‍പ്പെടെയുള്ളവര്‍ ഒരുമിച്ച് പോരാടേണ്ട സമയമാണിതെന്നും പ്രതിപക്ഷ ഉപനേതാവ് മല്ലികാര്‍ജുന കാര്‍ഗെ അഭിപ്രായപ്പെട്ടു.
ദുബൈ കണ്ണൂര്‍ ജില്ലാ കെ.എം.സി.സി ഏര്‍പ്പെടുത്തിയ പ്രഥമ ഇ. അഹമ്മദ് സ്മാരക ദേശീയ പുരസ്‌കാരങ്ങള്‍ ഡല്‍ഹിയിലെ കോണ്‍സ്റ്റിറ്റിയൂഷന്‍ ഹാളില്‍ വിതരണം ചെയ്തു സംസാരിക്കുകയായിരുന്നു അദ്ദേഹം. മതനിരപേക്ഷ ഇന്ത്യയുടെ അഭിമാനമായി ലോകവേദികളില്‍ നിറഞ്ഞു നിന്ന ഇ. അഹമ്മദ് രാജ്യത്തിനു വേണ്ടി അര്‍പ്പിച്ച സംഭാവനകള്‍ മഹത്തരമാണെന്നും അദ്ദേഹം സ്മരിച്ചു. മനുഷ്യാവകാശ പ്രവര്‍ത്തകനും എഴുത്തുകാരനും കോളമിസ്റ്റുമായ ഡോ. രാംപുരിയാനി, മാധ്യമ പ്രവര്‍ത്തകയും എഴുത്തുകാരിയുമായ ശ്രീമതി സാഗരിക ഘോഷ് , മദീന ഗ്രൂപ്പ് സംരംഭങ്ങളുടെ ചെയര്‍മാനും മുസ്‌ലിം ലീഗ് സംസ്ഥാന പ്രവര്‍ത്തക സമിതി അംഗവുമായ പി കെ അബ്ദുള്ള (പൊട്ടങ്കണ്ടി)എന്നിവര്‍ പ്രഥമ ദേശീയ പുരസ്‌കാരങ്ങള്‍ ഏറ്റുവാങ്ങി.
മുസ്‌ലിം ലീഗ് ദേശീയ ജനറല്‍ സെക്രട്ടറി പി കെ കുഞ്ഞാലിക്കുട്ടി എം പി അധ്യക്ഷത വഹിച്ചു. ഇന്ത്യ അതിന്റെ സമ്പന്നമായ ഭൂതകാലത്തിലേക്ക് തിരിച്ചുപോകുമെന്നും പ്രതിപക്ഷ ജനാധിപത്യചേരി കൂടുതല്‍ ശക്തമാകുമെന്നും അദ്ദേഹം പറഞ്ഞു.
മുസ്‌ലിം ലീഗ് ദേശീയ ഓര്‍ഗനൈസിങ് സെക്രട്ടറി ഇ ടി മുഹമ്മദ് ബഷീര്‍ എം പി അവാര്‍ഡ് ജേതാക്കളെ പരിചയപ്പെടുത്തി. പി വി അബ്ദുല്‍ വഹാബ് എംപി, കൊടിക്കുന്നില്‍ സുരേഷ് എംപി, അഡ്വ. ഹാരിസ് ബീരാന്‍, ഇബ്രാഹിം എളേറ്റില്‍, കെ ടി ഹാഷിം ഹാജി, സൈനുദ്ദീന്‍ ചേലേരി, ഇബ്രാഹിം മുറിച്ചാണ്ടി, എ സി ഇസ്മായില്‍, രഹദാദ് മൂഴിക്കര, ഒ.മൊയ്തു, റയീസ് തലശ്ശേരി എന്നിവര്‍ സംസാരിച്ചുദുബൈ കണ്ണൂര്‍ ജില്ലാ കെ.എം.സി.സി ഭാരവാഹികളായ എന്‍ യു ഉമ്മര്‍കുട്ടി, ഡോ. ഷാനിദ് ഉസ്മാന്‍, ടി പി അബ്ബാസ് ഹാജി, ഫൈസല്‍ മാഹി, കെ വി ഇസ്മായില്‍, ശറഫുദ്ദീന്‍ ഇരിട്ടി എന്നിവര്‍ നേതൃത്വം നല്‍കി.