മട്ടന്നൂര്‍: എടയന്നൂര്‍ തെരൂര്‍ മാപ്പിള എല്‍.പി സ്‌കൂളിലെ പാര്‍ലമെന്റ് തെരഞ്ഞെടുപ്പ് വിദ്യാഥികള്‍ക്ക് കൗതുകമായി. ആദ്യമായാണ് കംപ്യൂട്ടര്‍ സഹായത്തോടെ ഓണ്‍ലൈനായി വോട്ടിങ് നടത്തിയത്. പ്രസിഡന്‍ഷ്യല്‍ രീതിയില്‍ നടത്തിയ തെരഞ്ഞെടുപ്പില്‍ മത്സരാര്‍ഥികളായ മുഴുവന്‍ സ്ഥാനാര്‍ഥികളുടെയും പേരും ഫോട്ടോയും സഹിതം തെളിഞ്ഞു വരുന്ന സ്‌ക്രീനില്‍ വിദ്യാഥികള്‍ക്ക് ഇഷ്ടപ്പെട്ട സ്ഥാനാഥിയുടെ നേരേ ക്ലിക്ക് ചെയ്ത് വോട്ട് രേഖപ്പെടുത്താം. സ്‌കൂള്‍ പാര്‍ലമെന്റ് തെരഞ്ഞെടുപ്പിനായി പ്രത്യേകം തയ്യാറാക്കിയ സോഫ്റ്റ്‌വെയറിന്റെ സഹായത്തോടെ പൂര്‍ണമായും ജനാധിപത്യ രീതിയില്‍ എല്ലാവിധ ക്രമീകരണങ്ങളുമായാണ് തെരഞ്ഞെടുപ്പ് നടന്നത്. ഒന്ന് മുതല്‍ നാലുവരെ ക്ലാസുകളില്‍ പഠിക്കുന്ന കുട്ടികള്‍ വോട്ട് രേഖപ്പെടുത്തി. വോട്ടിങ്ങിലെ പുതുമയാര്‍ന്ന രീതി കുട്ടികളില്‍ അമ്പരപ്പും കൗതുകവും ഉണര്‍ത്തി. തുടര്‍ന്ന് കംപ്യൂട്ടറിന്റെ സഹായത്തോടെ തന്നെ വോട്ടെണ്ണി. പ്രധാനാധ്യാപിക കെ. പത്മാവതി വിജയികളെ പ്രഖ്യാപിച്ചു. സ്‌കൂള്‍ ലീഡറായി ഹാദിയ ഹാഷിം, ഡപ്യൂട്ടി ലീഡറായി സന ഫാത്തിമ, ബാലസഭ ചാര്‍ജ് ഹിബ ഫാത്തിമ, ശുചിത്വ ലീഡര്‍ ബല്‍ക്കീസ് എന്നിവരാണ് തെരഞ്ഞെടുക്കപ്പെട്ടത്. അധ്യാപകരായ പി.വി സഹീര്‍, സി.പി സലീത്ത്, കെ. മുഹമ്മദ് ഫായിസ് തെരഞ്ഞെടുപ്പിന് നേതൃത്വം നല്‍കി.