ബാഴ്‌സലോണ: ലാലിഗയിലെ ബാഴ്‌സലോണയുടെ കുതിപ്പ് തുടരുന്നു. ബാഴ്‌സയുടെ ഹോം ഗ്രൗണ്ടായ കാംപ്നൗവില്‍ ഇന്നലെ നടന്ന പോരാട്ടത്തില്‍ സെല്‍റ്റാവിഗോയെ എതിരില്ലാത്ത രണ്ട് ഗോളുകള്‍ക്കാണ് വീഴ്ത്തിയത്. ജയത്തോടെ 17 മത്സരങ്ങളില്‍ നിന്ന് 37 പോയിന്റുമായി ബാഴ്‌സ ഒന്നാം സ്ഥാനത്ത് തുടരുന്നു. രണ്ടാം സ്ഥാനത്തുള്ള അത്‌ലറ്റിക്കോ മാഡ്രിഡുമായി ബാഴ്‌സക്ക് മൂന്ന് പോയിന്റ് വിത്യാസമുണ്ട്. 10 ാം മിനുട്ടില്‍ ഫ്രഞ്ച് താരം ഒസ്മാന്‍ ഡംബലെയാണ് ആദ്യ ഗോള്‍ സ്‌കോര്‍ ചെയ്തത്. ആദ്യ പകുതി അവസാനിക്കാന്‍ മിനുട്ടുകള്‍ മാത്രം ശേഷിക്കെ സൂപ്പര്‍ താരം ലയണല്‍ മെസ്സിയാണ് രണ്ടാം ഗോള്‍ സ്വന്തമാക്കിയത്. മറ്റൊരു മത്സരത്തില്‍ അത്‌ലറ്റിക്കോ ബില്‍ബാവോ-വല്ലഡോളിഡ് മത്സരം 1-1ന് സമനിലയില്‍ കലാശിച്ചു. 2-1ന് വലന്‍സിയ ഹുയസ്‌കയെ പരാജയപ്പെടുത്തി. സെഗുണ്ട ലീഗില്‍ നിന്ന് സ്ഥാനക്കയറ്റം ലഭിച്ചെത്തിയ ടീമായ ഹുയസ്‌ക നിലവില്‍ പട്ടികയില്‍ അവസാന സ്ഥാനത്താണ്. 22 പോയിന്റുമായി വലന്‍സിയ എട്ടാം സ്ഥാനത്തും.