ലഖ്‌നൗ: ഉത്തര്‍പ്രദേശിലെ ഗോരഖ്പൂര്‍ മണ്ഡലത്തില്‍ മുഖ്യമന്ത്രി യോഗി ആദിത്യനാഥ് മാതൃകയായി പ്രഖ്യാപിച്ച ആശുപത്രിയിലാണ് ജീവശ്വാസം കിട്ടാതെ 63 കുട്ടികള്‍ മരിച്ച ദുരന്തം ഉണ്ടായത്. തെരഞ്ഞെടുപ്പിലുടനീളം യോഗി തന്റെ വികസന പ്രവര്‍ത്തനങ്ങളില്‍ വിളിച്ചോതിയതാണ് ഗോരഖ്പൂരിലെ ബാബാ രാഘവ് ദാസ്(ബി.ആര്‍.ഡി) മെഡിക്കല്‍ കോളജ്.
ഇവിടെ പിഞ്ചുകുട്ടികള്‍ മരിച്ചത് മുഖ്യമന്ത്രി യോഗിക്ക് വ്യക്തിപരമായ തിരിച്ചടികൂടിയാണ്. 68 ലക്ഷം രൂപ കുടിശിക വന്നതോടെ സ്വകാര്യ കമ്പനി ഓക്‌സിജന്‍ വിതരണം നിര്‍ത്തിയതാണ് 63 കുട്ടികളുടെ മരണത്തിന് ഇടയാക്കിയത്.
സ്വന്തം മണ്ഡലമായ ഗൊരഖ്പൂരില്‍ എം.പിയായിരുന്നപ്പോള്‍ ആശുപത്രിയില്‍ നടപ്പാക്കിയ വികസന പ്രവര്‍ത്തനങ്ങളായിരുന്നു തെരഞ്ഞെടുപ്പിലുടനീളം അദ്ദേഹം ചൂണ്ടിക്കാട്ടിയിരുന്നത്.
മസ്തിഷ്‌കത്തിലെ അണുബാധാ ചികിത്സക്ക് പേരുകേട്ട ആശുപത്രിയാണ് ബി.ആര്‍.ഡി മെഡിക്കല്‍ കോളജ് ആശുപത്രി. മസ്തിഷ്‌കജ്വരം തടയുന്നതിനായി യോഗിയുടെ നേതൃത്വത്തില്‍ സംസ്ഥാന വ്യാപകമായി ബോധവല്‍ക്കരണം നടക്കുന്നതിനിടയിലാണ് രാജ്യത്തെ നടുക്കിയ ദുരന്തമുണ്ടായത്. ഗോരഖ്പൂര്‍ മണ്ഡലത്തില്‍ മാത്രം മസ്തിഷ്‌കജ്വരം മൂലം ഈ വര്‍ഷം 114 കുട്ടികള്‍ മരിച്ചിട്ടുണ്ട്. ഇതിനെതുടര്‍ന്ന് യു.പിയിലെ 38 ജില്ലകളില്‍ പദ്ധതി നടപ്പാക്കി വരികയാണ്. കിഴക്കന്‍ യു.പിയിലെ പ്രധാന ആരോഗ്യപ്രശ്‌നമാണ് മസ്തിഷ്‌കജ്വരം.