നീലേശ്വരം: കിനാനൂര്‍ കരിന്തളം പഞ്ചായത്തിലെ കടലാടിപ്പാറയില്‍ ബോക്‌സൈറ്റ് ഖനനത്തിന്റെ ഭാഗമായുള്ള പാരിസ്ഥിതികാഘാത പഠനത്തിനു അനുമതി തേടി ആശാപുര കമ്പനി നിയമ യുദ്ധത്തിനൊരുങ്ങുന്നു. ഇതു സംബന്ധിച്ചു മുതിര്‍ന്ന അഭിഭാഷകരുമായി ഇതിനകം തന്നെ കമ്പനി ചര്‍ച്ചകള്‍ നടത്തിക്കഴിഞ്ഞു. പാരിസ്ഥിതികാഘാത പഠനത്തിനു ജില്ലാ ഭരണകൂടം തടസം നില്‍ക്കുന്നതായി ചൂണ്ടിക്കാട്ടി കേന്ദ്ര വനം, പരിസ്ഥിതി, ഖനി മന്ത്രാലയങ്ങള്‍ക്കു നല്‍കിയ പരാതിയില്‍ തങ്ങള്‍ക്കനുകൂലമായ നടപടി ഉണ്ടായില്ലെങ്കില്‍ കോടതിയെ സമീപിക്കാനാണു കമ്പനി ഒരുങ്ങുന്നത്. അടുത്ത മാസം പാരിസ്ഥിതികാഘാത പഠനം തുടങ്ങിയില്ലെങ്കില്‍ ഖനനത്തിനു കേന്ദ്ര വനം പരിസ്ഥിതി മന്ത്രാലയം നല്‍കിയ പ്രാഥമികാനുമതി റദ്ദാവും. ഇതു മറികടക്കാനാണ് ആശാപുര കോടതിയെ സമീപിക്കുന്നത്. പത്തു വര്‍ഷം മുന്‍പ് സംസ്ഥാന സര്‍ക്കാരില്‍ നിന്നു ലഭിച്ച മൈനിങ് ലീസ് തെളിവായി കോടതിയില്‍ ഹാജരാക്കിയേക്കും.
      അതേസമയം, ഒരു തരത്തിലുള്ള പഠനമോ ഖനനമോ കടലാടിപ്പാറയില്‍ അനുവദിക്കില്ലെന്ന നിലപാടിലാണു പ്രാദേശിക ഭരണകൂടവും നാട്ടുകാരും. ജനകീയ സര്‍വകക്ഷി സംഘം ഇതു സംബന്ധിച്ചു ചര്‍ച്ച ചെയ്യാനായി വരും ദിവസങ്ങളില്‍ മുഖ്യമന്ത്രിയേയും വ്യവസായ മന്ത്രിയേയും കാണും. പാരിസ്ഥിതികാഘാത പഠനത്തിനു സഹായം ചെയ്യണമെന്നു കാണിച്ച് ഈ വര്‍ഷം ആറു കത്തുകള്‍ കമ്പനി ജില്ലാ ഭരണകൂടത്തിനു നല്‍കിയിരുന്നെങ്കിലും അതിന്മേല്‍ ജില്ലാ ഭരണകൂടം നടപടി എടുത്തിരുന്നില്ല.
       പഠനത്തിനു സൗകര്യമൊരുക്കണമെന്നു കാണിച്ച് ആശാപുര കേന്ദ്രത്തിനു നല്‍കിയ പരാതിയില്‍ കേന്ദ്രസര്‍ക്കാരെടുക്കുന്ന നിലപാട് നിര്‍ണായകമാണ്.
അതേസമയം, ഈ വിഷയത്തില്‍ ബി.ജെ.പി നേതൃത്വം മൗനം പാലിക്കുന്നത് ജനങ്ങളില്‍ ആശങ്കയുയര്‍ത്തിയിട്ടുണ്ട്.