മനില: ഫലിപ്പീന്‍സില്‍ കനത്ത മഴയും കാറ്റും കാരണമായി 22 പേര്‍ മരിച്ചു. വെള്ളപ്പൊക്കവും ഉരുള്‍പൊട്ടലും കൊണ്ട് ദുരിതം നേരിടുകയാണ് ഇവിടം.

ആല്‍ബെ പ്രവിശ്യയിലെ ലെഗാസ്പി നഗരത്തിലാണ് കൂടുതല്‍ നാശനഷ്ടം. ഇവിടെ ഉരുള്‍പൊട്ടലില്‍ മൂന്നുപേര്‍ മരിച്ചു. നൂറു കണക്കിന് പേരെ മാറ്റിപാര്‍പ്പിക്കുകയും ചെയ്തു.

കാറ്റിന്റെ തീവ്രത കുറഞ്ഞെങ്കിലും ഉരുള്‍പൊട്ടലിലും വെള്ളപ്പൊക്കത്തിലുമാണു കൂടുതല്‍ പേര്‍ക്കും ജീവന്‍ നഷ്ടപ്പെട്ടത്. ഉരുള്‍പൊട്ടലില്‍ തകര്‍ന്ന വീടുകളില്‍ രക്ഷാപ്രവര്‍ത്തനം പൂര്‍ത്തിയായിട്ടില്ല. ഇതിനാല്‍ മരണസംഖ്യ ഇനിയും ഉയരുമെന്നാണ് അധികൃതര്‍ നല്‍കുന്ന വിവരം.

ദുരന്തത്തെ തുടര്‍ന്ന് ആയിരക്കണക്കിനു യാത്രികര്‍ തുറമുഖങ്ങളിലും വിമാനത്താവളങ്ങളും ബസ് ടെര്‍മിനലുകളിലും കുടുങ്ങിക്കിടക്കുകയാണ്. ദ്വീപുകള്‍ക്കിടയിലുള്ള കപ്പല്‍-ബോട്ട് യാത്രകളും റദ്ദാക്കിയിട്ടുണ്ട്.