സുല്‍ത്താന്‍ബത്തേരി: രേഖകളില്ലാതെ കടത്താന്‍ ശ്രമിച്ച വേദന സംഹാര ഗുളികളുമായി രണ്ടുയുവാക്കള്‍ പിടിയില്‍. മൈസൂരു കോഴിക്കോട് കെ.എസ്.ആര്‍.ടി.സി ബസില്‍ കടത്തുകയായിരുന്ന പാസ്‌മോ പ്രോസിവോന്‍ പ്ലസ് എന്ന ഗുളികളാണ് മുത്തങ്ങ എക്‌സൈസ് ചെക്ക് പോസ്റ്റില്‍ നിന്ന് പിടിച്ചെടുത്തത്.
കോഴിക്കോട് സ്വദേശികളായ കുണ്ടുളിവിപ്പല്‍ ശ്രീജിത്ത്(24), പള്ളിക്കുളങ്ങരതാഴം വീട്ടില്‍ മുബഷീര്‍(29) എന്നിവരാണ് എക്‌സൈസ് പിടിയിലായത്. എച്-വണ്‍ ഷെഡ്യൂളില്‍പെടുന്ന 672 ക്യാപ്‌സ്യൂള്‍ പിടിച്ചെടുത്തു.
ഉച്ചക്ക് രണ്ടോടെയാണ് സംഭവം. പരിശോധനകള്‍ക്കൊടുവില്‍ ഇവരെ ഡ്രഗ് ഡിപ്പാര്‍ട്ട്‌മെന്റിന് കൈമാറി. തൊണ്ടിമുതല്‍ സഹിതം വ്യാഴാഴ്ച ബത്തേരി കോടതിയില്‍ ഹാജരാക്കും. മൂന്നുവര്‍ഷം വരെ തടവ് ലഭിക്കാവുന്ന കേസാണിത്.
ഒരേ സമയം രണ്ടില്‍ കൂടുതല്‍ ഗുളികകള്‍ കഴിച്ചാല്‍ മയക്കുമരുന്നിന് തുല്യമാവും. മൈസൂരുവില്‍ നിന്നുമാണ് മരുന്ന് കൊണ്ടുവന്നത്. എക്‌സൈസ് സര്‍ക്കിള്‍ ഇന്‍സ്‌പെക്ടര്‍ സാബു പി കുര്യന്‍, എം.എസ് സുരേഷ്, എ അനില്‍കുമാര്‍, കെ.ജി ശശികുമാര്‍, എം.എ രഘു, കെ.കെ അജയകുമാര്‍ എന്നിവരടങ്ങിയ സംഘമാണ് പ്രതികളെ പിടികൂടിയത്.