കോഴിക്കോട്: സംസ്ഥാനത്തെ ഒരു വിഭാഗം സ്വകാര്യ ബസുടമകള്‍ ആഹ്വാനം ചെയ്ത പണിമുടക്ക് ആരംഭിച്ചു. രാവിലെ ആറു മുതല്‍ വൈകിട്ട് ആറുവരെയാണ് പണിമുടക്ക്. ചാര്‍ജ് വര്‍ധനവ് ഉള്‍പ്പെടെ വിവിധ ആവശ്യങ്ങള്‍ ഉന്നയിച്ചാണ് സമരം.

എന്നാല്‍ ഇന്നു നടക്കുന്ന സ്വകാര്യ ബസ് പണിമുടക്കില്‍ പങ്കെടുക്കില്ലെന്ന് ബസ് ഓപറേറ്റേഴ്‌സ് കോഡിനേഷന്‍ കമ്മിറ്റി അറിയിച്ചിട്ടുണ്ട്. ബസ് ഉടമകള്‍ ഉന്നയിച്ച ആവശ്യങ്ങളില്‍ മുഖ്യമന്ത്രിയുമായി സംസാരിച്ച് പരിഹാരം കാണാമെന്ന ഗതാഗതമന്ത്രിയുടെ ഉറപ്പിന്റെ അടിസ്ഥാനത്തിലാണ് സമരത്തില്‍നിന്ന് വിട്ടുനില്‍ക്കുന്നതെന്ന് കോഡിനേഷന്‍ ഭാരവാഹികള്‍ അറിയിച്ചു.

കേരളാ ബസ് ഓപറേറ്റേഴ്‌സ് ഓര്‍ഗനൈസേഷന്‍, ബസ് ഓപറേറ്റേഴ്‌സ് ഫോറം, ബസ് വ്യവസായ സംരക്ഷണ സമിതി, ഇന്റര്‍ സ്‌റ്റേറ്റ് ബസ് ഓപറേറ്റേഴ്‌സ് അസോസിയേഷന്‍ എന്നിവരാണ് സമരത്തില്‍ നിന്ന് വിട്ടുനില്‍ക്കുന്നത്.