എരുമപ്പെട്ടി: എരുമപ്പെട്ടിയില്‍ മൂന്ന് പേര്‍ക്ക് തെരുവ് നായയുടെ കടിയേറ്റു.
നായയെ പിന്നീട് നാട്ടുകാര്‍ തല്ലിക്കൊന്നു. എരുമപ്പെട്ടി തിപ്പല്ലൂര്‍ തൈക്കാടന്‍ ദേവസി (54), തോട്ടുങ്ങല്‍ പീടികയില്‍ കുഞ്ഞുമോന്‍ (65), പെരുമാടന്‍ വീട്ടില്‍ സിസിലി (60) എന്നിവര്‍ക്കാണ് നായയുടെ കടിയേറ്റത്.
വെള്ളിയാഴ്ച രാത്രിയിലാണ് എരുമപ്പെട്ടി കടങ്ങോട് റോഡ് സെന്ററിന് സമീപം തെരുവ് നായയുടെ ആക്രമണമുണ്ടായത്.
ഫര്‍ണീച്ചര്‍ കടയില്‍ നില്‍ക്കുകയായിരുന്ന ദേവസിയുടെ ശരീരത്തിന്റെ പലഭാഗങ്ങളിലും ബൈക്കില്‍ പോകാന്‍ നില്‍ക്കുകയായിരുന്ന കുഞ്ഞുമോന്റെ കാലിലും വീടിന് പുറകിലെ വരാന്തയില്‍ ഇരിക്കുകയായിരുന്ന സിസിലിയുടെ കൈയിലും തെരുവ് നായ കടിച്ച് പരുക്കേല്‍പിച്ചു.
അക്രമാസക്തനായ നായയെ നാട്ടുകാര്‍ തല്ലിക്കൊന്നു.
മേഖലയില്‍ തെരുവ് നായ്ക്കളുടെ ശല്യം രൂക്ഷമാണെന്ന് നിരവധി തവണ പരാതിപ്പെട്ടിട്ടും അധികൃതര്‍ നടപടിയെടുക്കുന്നില്ലെന്ന് ആക്ഷേപമുണ്ട്.