ചവറ: കാരിയര്‍ വള്ളത്തില്‍ ബോട്ടിടിച്ച് കടലില്‍ വീണ രണ്ട് മത്സ്യത്തൊഴിലാളികളെ രക്ഷപ്പെടുത്തി. ഇന്നലെ പുലര്‍ച്ചെ 5.30ന് ശക്തികുളങ്ങര ഹാര്‍ബറിന് പടിഞ്ഞാറുവശം കടലില്‍ വച്ചാണ് അപകടം. പ്രതികമകം എന്ന മത്സ്യ ബന്ധന ബോട്ട് സീ ഡ്രീംസ് എന്ന കാരിയര്‍ വള്ളത്തില്‍ യാദൃശ്ചികമായി ഇടിക്കുകയായിരുന്നു.
ഇടിയുടെ ആഘാതത്തില്‍ വള്ളത്തില്‍ ഉണ്ടായിരുന്ന കോഴിക്കോട് എസ്.വി മാര്‍ക്കറ്റ് സ്വദേശി ശശികുമാര്‍ (55), കല്ലേലിഭാഗം ചെറുവേലി കിഴക്ക് സ്വദേശി ബെന്നി (40) എന്നിവര്‍ തെറിച്ച് കടലില്‍ വീണു. സമീപത്തുണ്ടായിരുന്ന മദര്‍ വള്ളം വെള്ളത്തില്‍ വീണ മത്സ്യത്തൊഴിലാളികളെ രക്ഷപ്പെടുത്തി നീണ്ടകര ഫൗണ്ടേഷന്‍ ആശുപത്രിയില്‍ എത്തിച്ചു. പ്രാഥമിക ചികിത്സകള്‍ക്ക് ശേഷം ഇരുവരേയും വിട്ടയച്ചു. കേടുപാടുകള്‍ സംഭവിച്ച വള്ളത്തിന് ബോട്ടുടമ നഷ്ടപരിഹാരം നല്‍കാമെന്ന് സമ്മതിച്ചതിനാല്‍ കേസെടുത്തില്ല.