മേപ്പാടി: ജില്ലയിലെ ഭൂരിഭാഗം തോട്ടം തൊഴിലാളികള്‍ക്കും ഇത്തവണയും ബോണസില്ലാത്ത ഓണക്കാലം. ജില്ലയിലെ പ്രമുഖ തേയില തോട്ടമായ ഹാരിസണ്‍സ് മലയാളം കമ്പനിയില്‍ ഓണത്തിന് ദിവസങ്ങള്‍ മാത്രം ശേഷിക്കുമ്പോഴും ബോണസ് പ്രഖ്യാപിച്ചിട്ടില്ല. ബോണസ് നല്‍കാന്‍ സെപ്തംബര്‍ വരെ സമയമുണ്ടെങ്കിലും മുന്‍ കാലങ്ങളില്‍ ഓണത്തോടനുബന്ധിച്ച് ബോണസ് വിതരണം ചെയ്തിരുന്നു. ഇത് തൊഴിലാളിലാളികള്‍ക്ക് ഏറെ ആശ്വാസമായിരുന്നു. എന്നാല്‍ സാമ്പത്തിക പ്രതിസന്ധി ചൂണ്ടിക്കാട്ടി കഴിഞ്ഞ ഏതാനും ഓണത്തിന് ബോണസ് നല്‍കിയിരുന്നില്ല. ഏറെ പ്രതിഷേധങ്ങള്‍ക്കും സമരങ്ങള്‍ക്കും ഒടുവില്‍ ഡിസംബറോടെയാണ് തുക വിതരണം ചെയ്തത്. ഓണത്തിന് മുന്‍പായി ബോണസ് നല്‍കാന്‍ തയാറാവണമെന്നതാണ് തൊഴിലാളികളുടെ ആവശ്യം. കഴിഞ്ഞ വര്‍ഷം മിനിമം ബോണസ് തുകയായ 8.33 ശതമാനം ബോണസ് മാത്രമാണ് നല്‍കിയത്.