ചെന്നൈ: എ.ഐ.എ.ഡി.എം.കെ ലയനം പ്രഖ്യാപിച്ചു. ജയിലില്‍ കഴിയുന്ന ശശികലയെ പാര്‍ട്ടിയില്‍ നിന്നും പുറത്താക്കണമെന്ന പനീര്‍ശെല്‍വത്തിന്റെ ആവശ്യം അംഗീകരിച്ചു. ഇതു സംബന്ധിച്ച പ്രമേയം പാസാക്കാനും തീരുമാനമായി. ഉപമുഖ്യമന്ത്രിയായി ഒ പനീർശെല്‍വം സത്യപ്രതിജ്ഞ ചെയ്തു.

പാർട്ടിയെ പിളർത്താൻ ആർക്കും കഴിയില്ലെന്ന് പാർട്ടി ആസ്ഥാനത്ത് ലയനം പ്രഖ്യാപിച്ചുകൊണ്ട് പനീർസെൽവം പറഞ്ഞു. ചെന്നൈ റോയപ്പേട്ടയിലെ പാര്‍ട്ടി ആസ്ഥാനത്ത് പ്രിസീഡിയം ചെയര്‍മാന്‍ ഇ മധുസൂദനന്റെ അധ്യക്ഷതയില്‍ ചേര്‍ന്ന യോഗത്തിലാണ് ലയനത്തിന് ധാരണയായത്. 

ഇരുപക്ഷത്തെയും പ്രമുഖ നേതാക്കള്‍ അണ്ണാ ഡി.എം.കെ ആസ്ഥാനത്ത് എത്തിയിരുന്നു.

മുഖ്യമന്ത്രി സ്ഥാനത്തു നിന്നും രാജിവെച്ച ശേഷം ഫെബ്രുവരി അഞ്ചിനാണ് അവസാനമായി പനീര്‍സെല്‍വം എ.ഐ.എ.ഡി.എം.കെ ആസ്ഥാനത്തെത്തിയത്. ആറു മാസത്തിനു ശേഷമാണ് ഒ.പി.എസ്- ഇ.പി.എസ് വിഭാഗങ്ങള്‍ ഒന്നിക്കുന്നത്.

ജയലളിതയുടെ മരണത്തെ തുടര്‍ന്നുള്ള അധികാര തര്‍ക്കങ്ങളാണ് എ.ഐ.എ.ഡി.എം.കെ പിളര്‍പ്പിലേക്ക് നയിച്ചത്.

.