കോഴിക്കോട്: പി.വി അന്‍വര്‍ എം.എല്‍.എയുടെ ആനുകൂല്യം പറ്റേണ്ട അവസ്ഥ കോണ്‍ഗ്രസിനില്ലെന്ന് ഡി.സി.സി പ്രസിഡന്റ് ടി.സിദ്ദീഖ്. വിവാദ വാട്ടര്‍ തീം പാര്‍ക്കിനുള്ള അനുമതി പഞ്ചായത്ത് റദ്ദാക്കുമെന്നാണ് പ്രതീക്ഷ. പാര്‍ക്ക് നിര്‍മാണത്തിനെതിരേ കോണ്‍ഗ്രസ് സമരം നടത്തും. 23ന് നിലമ്പൂരില്‍ നടക്കുന്ന സമരത്തില്‍ താന്‍ സംബന്ധിക്കും. കോണ്‍ഗ്രസ് ഒരു വിട്ടുവീഴ്ചയ്ക്കും തയാറല്ലെന്നും അദ്ദേഹം പറഞ്ഞു.
എല്ലാ പാര്‍ട്ടിക്കാരും എം.എല്‍.എയില്‍നിന്ന് പണം വാങ്ങിയിട്ടുണ്ടെന്ന് കൂടരഞ്ഞി പഞ്ചായത്ത് പ്രസിഡന്റ് സോളി ജോസഫ് ഒരു സ്വകാര്യ ചാനലിനോടു വെളിപ്പെടുത്തിയിരുന്നു. എം.എല്‍.എയുടെ സൗജന്യംപറ്റാത്ത നേതാക്കള്‍ കൂടരഞ്ഞി പഞ്ചായത്തിലുണ്ടാകില്ല. തദ്ദേശ തെരഞ്ഞെടുപ്പ് സമയത്തും നാട്ടില്‍ നടക്കുന്ന ചെറുതും വലുതുമായ ഏത് പരിപാടിക്കും പിരിവിനായി എം.എല്‍.എയെ സമീപിക്കാറുണ്ടെന്നും അവര്‍ വ്യക്തമാക്കിയിരുന്നു.