നഗരൂര്‍: ആല്‍ത്തറമൂട്ടിലും സമീപ പ്രദേശത്തുമായി രണ്ടു പേര്‍ക്ക് പേപട്ടിയുടെ കടിയേറ്റു. ഒരാള്‍ക്ക് ഗരുതരമായി പരുക്കേറ്റു. നഗരൂര്‍ പാവൂര്‍കോണം തേക്കുവിളയില്‍ വീട്ടില്‍ ചന്ദ്രിക (48), ആല്‍ത്തറമൂട് ദര്‍ശനാവട്ടം കോട്ടൂര്‍കോണം, ചരുവിള പുത്തന്‍വീട്ടില്‍ കെ. ബാബു (59) എന്നിവര്‍ക്കാണ് കടിയേറ്റത്. കഴിഞ്ഞ ദിവസം രാവിലെ 9 കഴിഞ്ഞായിരുന്നു നായയുടെ പരാക്രമം.
വീട്ടില്‍ നിന്നും സാധനങ്ങള്‍ വാങ്ങാനായി വന്ന ചന്ദ്രികയെ വെള്ളംകൊള്ളിയില്‍ വച്ച് നായ ആക്രമിക്കുകയായിരുന്നു. ഇവരുടെ കാലിനും കൈക്കും ഗുരുതര പരുക്കുണ്ട്. ഇവരെ മെഡിക്കല്‍ കോളജില്‍ പ്രവേശിപ്പിച്ചു. ആല്‍ത്തറമൂട് ജങ്ഷനില്‍ വച്ചാണ് ബാബുവിനെ നായ കടിച്ചത്.
നെഞ്ചിലും കൈയിലും പരുക്കുണ്ട്. ബാബു കേശവപുരം ആശുപത്രിയില്‍ ചികിത്സ തേടി.
വിദ്യാര്‍ഥികളടക്കം നിരവധി പേരെ നായ കടിക്കാന്‍ ശ്രമിച്ചു. രോഷാകുലരായ നാട്ടുകാര്‍ ഒടുവില്‍ നായയെ തല്ലിക്കൊന്നു.