ലക്‌നോ: ട്രെയിന്‍ പാളം തെറ്റിയുളള അപകടം ഉത്തര്‍പ്രദേശില്‍ വീണ്ടും. കഫിയാത്ത് എക്‌സ്പ്രസ്സ് ആണ് അപകടത്തില്‍ പെട്ടത്. ഔറിയയില്‍ പുലര്‍ച്ചെ 2.40നോടടുത്താണ് സംഭവം. 50 പേര്‍ക്ക് പരുക്കേറ്റെന്നാണ് റിപ്പോര്‍ട്ട്.

അസംഗഢില്‍ നിന്ന ഡല്‍ഹിയിലേക്ക് വരികയായിരുന്നു. ഡമ്പറുമായി കൂട്ടിയിടിച്ചതിനെ തുടര്‍ന്ന് തീവണ്ടിയുടെ 10 ബോഗികളും എന്‍ജിനുമാണ് പാളം തെറ്റിയത്.

ഇതുവരെ മരണമൊന്നും സ്ഥിരീകരിച്ചിട്ടില്ലെന്ന് റയില്‍വേ വക്താവ് അനില്‍ സക്‌സേന അറിയിച്ചു. പരിക്കേറ്റ യാത്രക്കാരെ സമീപത്തെ ആശുപത്രികളില്‍ പ്രവേശിപ്പിച്ചു.

ഉത്തര്‍പ്രദേശിലെ മുസാഫര്‍ നഗറില്‍ കഴിഞ്ഞ 19ന് തീവണ്ടി പാളം തെറ്റിയതിനെത്തുടര്‍ന്ന് 23 പേര്‍ മരിച്ചിരുന്നു. പുരിഹരിദ്വാര്‍കലിംഗ ഉത്കല്‍ എക്പ്രസിന്റെ 14 ബോഗികളാണ് അന്ന് പാളം തെറ്റിയത്. ഖതൗലിയിലുണ്ടായ അപകടത്തില്‍ 100 ലധികം പേര്‍ക്ക് പരിക്കേറ്റിരുന്നു.