തിരുവനന്തപുരം: അടിസ്ഥാനസൗകര്യ വികസനപദ്ധതികളുടെ അതിവേഗ അംഗീകാരത്തിനും ഫണ്ടിനുമുള്ള കേരള സര്‍ക്കാര്‍ ഏജന്‍സിയായ കിഫ്ബി, പദ്ധതികളുടെ ആസൂത്രണവും നിര്‍വഹണവും സംബന്ധിച്ച പ്രശ്‌നങ്ങളും നൂതനരീതികളും ചര്‍ച്ച ചെയ്യുന്നതിനായി സംഘടിപ്പിക്കുന്ന ഉന്നതതല ദേശീയ സെമിനാര്‍ നാളെ നടക്കും. തിരുവനന്തപുരം ഹില്‍ട്ടന്‍ ഗാര്‍ഡന്‍ ഇന്‍ ഹോട്ടലില്‍ മുഖ്യമന്ത്രി പിണറായി വിജയന്‍ സെമിനാര്‍ ഉദ്ഘാടനം ചെയ്യും.
പ്രമുഖ നിക്ഷേപ സ്ഥാപനങ്ങള്‍, വ്യവസായ വിദഗ്ധര്‍, സാമ്പത്തിക മേഖലയിലെ പ്രമുഖ നിയന്ത്രണ സ്ഥാപനങ്ങള്‍, നയകര്‍ത്താക്കള്‍, സുപ്രധാന സാമ്പത്തിക പങ്കാളികള്‍ തുടങ്ങിയവര്‍ പങ്കെടുക്കും. ധനമന്ത്രി ഡോ. തോമസ് ഐസക് സെമിനാറില്‍ അധ്യക്ഷത വഹിക്കും. സെബി ചെയര്‍മാന്‍ അജയ് ത്യാഗി മുഖ്യപ്രഭാഷണം നടത്തും. കിഫ്ബി സി.ഇ.ഒ ഡോ.കെ.എം ഏബ്രഹാം സ്വാഗതം പറയും.