കൊച്ചി: കലൂര്‍ പി.വി.എസ് കള്‍വര്‍ട്ടിന്റെ പുനഃനിര്‍മാണത്തിന് നഗരസഭ വിഹിതമായ 50 ലക്ഷം രൂപ മേയര്‍ സൗമിനി ജയിന്‍ ഇന്നലെ കൈമാറി. കെ.എസ്.ഇ.ബി, ബി.എസ്.എന്‍.എല്‍, കേരള വാട്ടര്‍ അതേറിറ്റി എന്നീ സ്ഥാപനങ്ങള്‍ക്കാണ് തുക കൈമാറിയത്. കലൂരിലെയും പരിസരപ്രദേശങ്ങളിലെയും വെള്ളക്കെട്ട് ഒഴിവാക്കുന്നതിനായി ഈ ഭാഗത്ത് കല്‍വര്‍ട്ട് നിര്‍മിക്കണമെന്ന ആവശ്യത്തിന് പതിറ്റാണ്ടുകളുടെ പഴക്കമുണ്ട്. നിരന്തരമായ സമ്മര്‍ദത്തെ തുടര്‍ന്ന് മുന്‍ സര്‍ക്കാര്‍ 4.40 കോടി രൂപ നിര്‍മാണത്തിന് അനുവദിച്ചു. 2016 ജൂലായില്‍ നിര്‍മാണം ആരംഭിച്ചുവെങ്കിലും കല്‍വട്ടറിന്റെ അടിയിലൂടെ പോകുന്ന പൈപ്പുകള്‍ മാറ്റുന്നതിന്റെ ചെലവ് ആര് വഹിക്കുമെന്ന തര്‍ക്കത്തില്‍ തട്ടി നിര്‍മാണം പാതിവഴിയില്‍ നിലച്ചു.

കെ.എസ്.ഇ.ബിയുടെ 11 കെ.വി കേബിളുകളും ജല അതോറിട്ടിയുടെ കൂറ്റന്‍ പൈപ്പുകളുമാണ് വിഘാതമായത്. ഇത് മാറ്റി പുതിയത് സ്ഥാപിക്കുന്നതിന് കെ.എസ്.ഇ.ബി, ബി.എസ്.എന്‍.എല്‍, വാട്ടര്‍ അതോറിട്ടി തുടങ്ങിയ ഏജന്‍സികള്‍ക്ക് നഗരസഭ 50 ലക്ഷം രൂപ നല്‍കണമെന്നായിരുന്നു വ്യവസ്ഥ. നഗരസഭ തുക നല്‍കാന്‍ വൈകിയതോടെ കഴിഞ്ഞ നാലു മാസമായി നിര്‍മാണ പ്രവര്‍ത്തനങ്ങള്‍ തടസപ്പെട്ടു.
ഇപ്പോള്‍ നഗരസഭ വിഹിതം കൈമാറിയെങ്കിലും കല്‍വര്‍ട്ടിന്റെ നിര്‍മാണം പൂര്‍ത്തീകരിക്കുന്നതിന് ഇനിയും സമയമെടുക്കും. കൗണ്‍സില്‍ ഹാളില്‍ നടന്ന ചെക്ക് കൈമാറല്‍ ചടങ്ങില്‍ സ്റ്റാന്‍ഡിംഗ് കമ്മിറ്റി ചെയര്‍മാന്‍മാരായ ഗ്രേസി ജോസഫ്, ഷൈനി മാത്യു, കെ.വി.പി കൃഷ്ണകുമാര്‍, പി.എം ഹാരിസ്, പ്രതിപക്ഷ നേതാവ് കെ.ജെ ആന്റണി, ഡിവിഷന്‍ കൗണ്‍സിലറായ എം.ജി അരിസ്റ്റോട്ടില്‍ എന്നിവര്‍ സംബന്ധിച്ചു.