നേമം: രക്ഷാബന്ധന്‍ ആഘോഷങ്ങളുടെ ഭാഗമായി സ്റ്റേഷനില്‍ വച്ച് രാഖി കെട്ടിയ പൊലിസുകാര്‍ക്കെതിരേ നടപടി. തിരുവനന്തപുരം ജില്ലയിലെ നരുവാമൂട് സ്റ്റേഷനിലെ എ.എസ്.ഐ ശശികുമാര്‍, എസ്.സി.പി.ഒമാരായ ബിനുകുമാര്‍, ജയകുമാര്‍, സി.പി.ഒ സുനില്‍ എന്നിവര്‍ക്കെതിരേയാണ് നടപടിയെടുത്തത്. ശിക്ഷാ നടപടികളുടെ ഭാഗമായുള്ള കഠിന പരിശീലനത്തിനായി ഇവരെ എ.ആര്‍ ക്യാംപിലേക്ക് മാറ്റി.
രക്ഷാബന്ധന്‍ ദിനത്തില്‍ സ്റ്റേഷനിലെത്തിയ യുവമോര്‍ച്ച പ്രവര്‍ത്തകരാണ് പൊലിസുകാരുടെ കൈയില്‍ രാഖി കെട്ടിയത്. ഇത് പ്രവര്‍ത്തകര്‍ തന്നെ ഫോട്ടോയെടുത്ത് നവമാധ്യമങ്ങളില്‍ പ്രചരിപ്പിച്ചു. സംഭവം വിവാദമായതിനെ തുടര്‍ന്ന് സ്‌പെഷല്‍ ബ്രാഞ്ച് റിപ്പോര്‍ട്ട് തേടിയതിനെ തുടര്‍ന്നാണ് നടപടി.