കണ്ണൂര്‍: ഒരുദിന വരുമാനം ആതുരസേവനത്തിനെന്ന പ്രമേയത്തില്‍ എസ്.കെ.എസ്.എസ്.എഫ് ജില്ലാകമ്മിറ്റിയുടെ കീഴിലുള്ള സഹചാരി റിലീഫ് സെല്ലിനായി ബലിപെരുന്നാള്‍ ദിനത്തില്‍ സംഘടിപ്പിക്കുന്ന ഫണ്ട് ശേഖരണം വിജയിപ്പിക്കാന്‍ എല്ലാവരും മുന്നിട്ടിറങ്ങണമെന്ന് സമസ്ത നേതാക്കളായ പി.കെ.പി അബ്ദുസലാം മുസ്‌ലിയാര്‍, മാണിയൂര്‍ അഹ്മദ് മൗലവി, പി.പി ഉമര്‍ മുസ്‌ലിയാര്‍, കെ.കെ.പി അബ്ദുല്ല ഫൈസി എന്നിവര്‍ ആഹ്വാനം ചെയ്തു. കഷ്ടതയനുഭവിക്കുന്ന അര്‍ഹരായ രോഗികളെ കണ്ടെത്തി കൃത്യമായ സാന്ത്വനം നല്‍കാന്‍ സഹചാരി സമിതി കഠിനാധ്വാനം ചെയ്യണമെന്നും ഇതിനായി വേണ്ട സഹായങ്ങള്‍ നല്‍കാന്‍ മുഴുവനാളുകളും മുന്നിട്ടിറങ്ങണമെന്നും നേതാക്കള്‍ കൂട്ടിച്ചേര്‍ത്തു. സഹചാരി സമിതിയുടെ കീഴില്‍ പാപ്പിനിശ്ശേരി എം.എം ഹോസ്പിറ്റലില്‍ മാസംതോറും നൂറോളം ഡയാലിസിസുകളാണ് സൗജന്യമായി ചെയ്യുന്നത്. അപേക്ഷകര്‍ ധാരാളമുള്ളതിനാല്‍ കൂടുതല്‍ രോഗികള്‍ക്ക് സാന്ത്വനം നല്‍കാന്‍ കൂടുതല്‍ ഫണ്ട് അനിവാര്യമായതിനാല്‍ മഹല്ല് കമ്മിറ്റി ഭാരവാഹികളും സംഘടനാ പ്രവര്‍ത്തകരും ഊര്‍ജിതമായി രംഗത്തിറങ്ങണമെന്നും നേതാക്കള്‍ അഭ്യര്‍ഥിച്ചു.