മാന്നാര്‍: ആറന്മുള ഉതൃട്ടാതി ജലമേളയില്‍ പങ്കെടുക്കുന്നതിനായി ചെന്നിത്തല പള്ളിയോടം നീരണിഞ്ഞു. ചെന്നിത്തല തെക്ക് 93-ാം നമ്പര്‍ എന്‍.എസ്.എസ് കരയോഗത്തിന്റെ ഉടമസ്ഥതയിലുള്ള ബി- ബാച്ച് പള്ളിയോടമാണ് കഴിഞ്ഞ ദിവസം രാവിലെ അച്ചന്‍ കോവിലാറ്റിലെ വലിയപെരുമ്പുഴ കിഴക്കേ കടവില്‍ നീരണിഞ്ഞത്. പള്ളിയോടത്തിന് മാവേലിക്കര മണ്ഡപത്തിന്‍ കടവില്‍ സ്വീകരണം നല്‍കും. രാജ ഭരണ കാലത്ത് തുടങ്ങിയ സ്വീകരണ പരിപാടി ഇവിടെ അശാസ്ത്രീയമായി നടന്ന നിര്‍മ്മാണ പ്രവര്‍ത്തനങ്ങള്‍ കാരണമാണ് മുടങ്ങി കിടന്നത്. അച്ചന്‍ കോവിലാറ്റില്‍ എക്കലും ചെളിയും മറ്റ് മാലിന്യങ്ങളും അടിഞ്ഞു കിടന്നിരുന്നതിനാല്‍ പള്ളിയോടത്തിന് ഇവിടെ അടുക്കാന്‍ കഴിഞ്ഞിരുന്നില്ല. കഴിഞ്ഞ ദിവസം മേജര്‍ ഇറിഗേഷന്‍ വകുപ്പിന്റെ മേല്‍ നോട്ടത്തില്‍ നടന്ന നവീകരണത്തിന് ശേഷമാണ് ഇപ്പോള്‍ പള്ളിയോടത്തിന് അടുക്കാന്‍ സാധിച്ചത്.