മാനന്തവാടി: ജോലിയിലുണ്ടായിരുന്ന പൊലിസുകാരെ തടഞ്ഞു നിര്‍ത്തി മര്‍ദിച്ച് പരുക്കേല്‍പ്പിച്ച സംഭവത്തില്‍ മൂന്നു പേര്‍ അറസ്റ്റിലായി.
എടവക പാണ്ടിക്കടവ് സ്വദേശികളായ തേക്കിന്‍കാട്ടില്‍ ശ്യാംദാസ്(22), പുളിക്കല്‍ ഹൗസില്‍ ജിതിന്‍(22), മുസ്‌ലിയാര്‍ ഹൗസില്‍ ഷാക്കിര്‍(27) എന്നിവരാണ് അറസ്റ്റിലായത്. മാനന്തവാടി ഫസ്റ്റ് ക്ലാസ് ജുഡീഷ്യല്‍ മജിസ്‌ട്രേറ്റ് (രണ്ട്) ഇവരെ റിമാന്റ് ചെയ്തു.
തിരുവോണ ദിനത്തില്‍ രാത്രിയായിരുന്നു കേസിനാസ്പദമായ സംഭവം. മാനന്തവാടി ബീവറേജ് ചില്ലറ വില്‍പനശാലയുടെ സുരക്ഷക്കായി വിന്യസിച്ച രണ്ടു പൊലിസുകാര്‍ക്കാണ് ഗാന്ധി പാര്‍ക്കില്‍ വച്ച് മര്‍ദനമേറ്റത്.
ഗാന്ധി പാര്‍ക്കില്‍ സംഘര്‍ഷം നടക്കുന്നതറിഞ്ഞ് എത്തിയതായിരുന്നു ഇവര്‍.
സംഘര്‍ഷം നടത്തിയ ഇരുവിഭാഗത്തെയും പിരിച്ചുവിട്ട് മടങ്ങുമ്പോള്‍ അറസ്റ്റിലായ മൂവരും മറ്റൊരാളും ചേര്‍ന്ന് പൊലിസ് ഉദ്യേഗസ്ഥരെ തടഞ്ഞു വച്ച് മര്‍ദിക്കുകയായിരുന്നു. സംഭവവുമായി ബന്ധമുള്ള ഒരാള്‍ ഒളിവിലാണ്.