മംഗളൂരു: മെഡിക്കല്‍ സീറ്റ് വാഗ്ദാനം ചെയ്ത് ലക്ഷങ്ങള്‍ തട്ടിയ കേസില്‍ 10 പേര്‍ അറസ്റ്റില്‍. കൊല്‍ക്കത്ത സ്വദേശികളായ അജയ് കുമാര്‍ മുഖര്‍ജി (41), ബിശ്വാസ് എന്ന മഹേഷ് കുമാര്‍ (54) ജാര്‍ഖണ്ഡ് സ്വദേശികളായ അനൂപ് സിങ് (35), ധീരജ് ശര്‍മ എന്ന വിക്രം (30), സഞ്ജയ് കുമാര്‍ (26), ലക്‌നൗ സ്വദേശി സൗരഭ് ഗുപ്ത എന്ന ദിവാകര്‍ (32), റാഞ്ചി സ്വദേശി മനീഷ് കുമാര്‍ ഷാ (30), ബിഹാര്‍ സ്വദേശി അമിത് രഞ്ജന്‍ (25), ഹൈദരാബാദ് സ്വദേശികളായ രാജീവ് കുമാര്‍(30), അനില്‍ തുളസിറാം (62) എന്നിവരാണ് പൊലിസ് പിടിയിലായത്.
സംഘത്തിന്റെ കേന്ദ്രത്തില്‍ നിന്ന് 10.7 ലക്ഷം രൂപ, 5.4 ലക്ഷത്തിന്റെ രണ്ട് ഡിമാന്റ് ഡ്രാഫ്റ്റുകള്‍, 20 മൊബൈല്‍ ഫോണുകള്‍, രണ്ട് ലാപ്‌ടോപുകള്‍, ഒരു ഐപാഡ്, പ്രിന്റര്‍, ഇന്നോവ, ഷെവര്‍ലെറ്റ് കാറുകള്‍, നഗരത്തിലെ രണ്ട് പ്രമുഖ മെഡിക്കല്‍ കോളജുകളുടെ പേരിലുള്ള വ്യാജ ഐ.ഡി കാര്‍ഡുകള്‍ എന്നിവയും മംഗളൂരു പൊലിസ് പിടിച്ചെടുത്തിട്ടുണ്ട്.
മെഡിക്കല്‍ സീറ്റുകള്‍ വാഗ്ദാനം ചെയ്തു ഇവര്‍ ലക്ഷങ്ങള്‍ തട്ടിയെടുത്തതായി പരാതി ലഭിച്ചതിനെ തുടര്‍ന്നാണ് പൊലിസ് അന്വേഷണം നടത്തി സംഘത്തെ പിടികൂടിയത്. ഡല്‍ഹി സ്വദേശിയായ കമല്‍ സിങ്, രാജസ്ഥാന്‍ സ്വദേശി മഹേന്ദര്‍ എന്നിവര്‍ നല്‍കിയ പരാതിയിലാണ് പ്രതികളെ പൊലിസ് അറസ്റ്റ് ചെയ്തത്.
മക്കള്‍ക്ക് മെഡിക്കല്‍ കോളജില്‍ സീറ്റ് തരപ്പെടുത്തി തരാമെന്നുപറഞ്ഞ് ഇവരുടെ പക്കല്‍ നിന്ന് 5.4 ലക്ഷത്തിന്റെ ഡിമാന്റ് ഡ്രാഫ്റ്റ് വാങ്ങുകയും പിന്നീട് പ്രതികള്‍ മുങ്ങുകയും ചെയ്തു