ഹൈദരാബാദ്: എഴുത്തുകാരനും ചിന്തകനും ദളിത് പ്രവര്‍ത്തകനുമായ കാഞ്ച ഐലയ്യയ്ക്ക് ഭീഷണി. ഇതേതുടര്‍ന്ന് ഹൈദരാബാദിലെ ഒസ്മാനിയ യൂണിവേഴ്‌സിറ്റി പൊലിസ് സ്റ്റേഷനില്‍ തിങ്കളാഴ്ച ഉച്ചയോടെ ഇളയ്യ പരാതി നല്‍കി. ഞായറാഴ്ച്ച പലതവണ തന്റെ ഫോണിലേക്ക് ഭീഷണി സന്ദേശങ്ങള്‍ വന്നതായി കാഞ്ച പരാതിയില്‍ പറയുന്നു.

നാവു മുറിച്ചെടുക്കുമെന്നും അപായപ്പെടുത്തുമെന്നും അജ്ഞാതര്‍ ഫോണില്‍ വിളിച്ച് ഭീഷണിപ്പെടുത്തിയെന്നും പരാതിയിലുണ്ട്. തന്റെ സാമാജിക സ്മഗളുരു കോളത്തൊള്ളു(വൈശ്യാസ് ആര്‍ സോഷ്യല്‍ സ്മഗ്‌ളേഴ്‌സ്) എന്ന പുസ്തകമാണ് ഭീഷണിക്ക് കാരണമായതെന്നാണ് ഐലയ്യ പരാതിയില്‍ ചൂണ്ടിക്കാട്ടുന്നത്.

തന്റെ ജീവന് എന്തെങ്കിലും സംഭവിച്ചാല്‍ ആര്യ വൈശ്യ സംഘമായിരിക്കും അതിന് ഉത്തരവാദിയെന്നും തനിക്ക് പൊലിസ് സംരക്ഷണം നല്‍കണമെന്നും ഐലയ്യ പരാതിയില്‍ പറയുന്നു.

പുസ്തകത്തിലെ പല പരാമര്‍ശങ്ങളും ഒരു വിഭാഗത്തെ ആക്ഷേപിക്കുന്നതാണെന്നും പുസ്തകം ഉടന്‍ പിന്‍വലിക്കണമെന്നും പറഞ്ഞ് വൈശ്യ അസോസിയേഷന്‍ പുസ്തകത്തിനെതിരെ പൊലിസില്‍ പരാതി നല്‍കിയിരുന്നു.