ചെറുപുഴ: പാടിയോട്ടുചാല്‍ പൊന്നംവയലില്‍ പുലിയിറങ്ങിയതായി അഭ്യൂഹം. പൊന്നംവയല്‍ സ്‌കൂളിനു പിന്‍വശത്ത് ഇലവുങ്കല്‍ ഗോപിനാഥിന്റെ കശുമാവിന്‍ തോട്ടത്തിലാണ് പുലിയുടേതെന്നു സംശയിക്കുന്ന കാല്‍പാദം കാണപ്പെട്ടത്. നായകള്‍ നിര്‍ത്താതെ കുരയ്ക്കുന്നതു കണ്ട് നാട്ടുകാര്‍ നടത്തിയ അന്വേഷണത്തിലാണ് കാല്‍പാദങ്ങള്‍ കണ്ടെത്തിയത്. നാട്ടുകാര്‍ വിവരമറിയിച്ചതിനെ തുടര്‍ന്ന് ചെറുപുഴ പൊലിസും വനംവകുപ്പുദ്യോഗസ്ഥരും സ്ഥലത്തെത്തി അന്വേഷണം നടത്തി. പൊന്നംവയലിനു തൊട്ടടുത്ത് റിസര്‍വ് വനമേഖലയാണ്.
കരുവഞ്ചാല്‍ ഫോറസ്റ്റ് സെക്ഷന്‍ ഓഫിസര്‍ കെ.വി മനോജ്കുമാര്‍,റാപ്പിഡ് റെസ്‌പോണ്‍സ് ടീം സെക്ഷന്‍ ഓഫിസര്‍ ടി ഉണ്ണികൃഷ്ണന്‍, ബീറ്റ് ഓഫിസര്‍മാരായ സുഭാഷ്, വിനു എന്നിവരടങ്ങുന്ന സംഘം സ്ഥലത്തെത്തി.
കാല്‍പ്പാദം കാട്ടുപൂച്ചയുടേതാണെന്ന് സംശയിക്കുന്നതായി അധികൃതര്‍ അറിയിച്ചു.