ഇംഫാല്‍: മ്യാന്‍മറില്‍ നിന്ന് റോഹിംഗ്യന്‍ മുസ്്‌ലിംകള്‍ ഇന്ത്യയിലേക്ക് കടന്നേക്കുമെന്ന സംശയത്തെ തുടര്‍ന്ന് മണിപ്പൂര്‍ അതിര്‍ത്തിയില്‍ ജാഗ്രതാ നിര്‍ദേശം. സംസ്ഥാനാതിര്‍ത്തി കടന്ന് റോഹിംഗ്യകള്‍ എത്തുന്നുണ്ടെന്ന് ചൂണ്ടിക്കാട്ടി സംസ്ഥാനാതിര്‍ത്തിയില്‍ ശക്തമായ പട്രോളിങാണ് പൊലിസും ബി.എസ്.എഫും നടത്തുന്നത്. അതേസമയം ഇന്നലെ അതിര്‍ത്തി കടന്ന് ആരും എത്തിയിട്ടില്ലെന്ന് പൊലിസ് അറിയിച്ചു.
മണിപ്പൂരിലെ അതിര്‍ത്തി നഗരമായ മോറെയിലാണ് ശക്തമായ ജാഗ്രതാ നിര്‍ദേശം നല്‍കിയത്. സംശയാസ്പദമായ സാഹചര്യത്തില്‍ ആരെയെങ്കിലും കണ്ടാല്‍ പിടികൂടാന്‍ പൊലിസിന് സര്‍ക്കാര്‍ നിര്‍ദേശം നല്‍കിയിട്ടുണ്ട്.
മോറെ നഗരത്തിലേക്കു സഞ്ചരിക്കുന്നവര്‍ സാധുവായ രേഖകള്‍ കരുതണമെന്നും നിര്‍ദേശമുണ്ട്. മ്യാന്‍മാര്‍ പട്ടണമായ താമുവില്‍ നിന്ന് മോറെയിലേക്ക് രേഖയുണ്ടെങ്കില്‍ സഞ്ചരിക്കാമെന്നും വൈകിട്ട് നാലു മണിക്കു മുന്‍പ് തിരിച്ചുപോകണമെന്നും നിര്‍ദേശമുണ്ട്. അതിര്‍ത്തിയിലെ 364 കിലോ മീറ്റര്‍ വിസ്തൃതി പ്രദേശങ്ങളിലാണ് മുഖ്യമന്ത്രി എന്‍ ബിരെണ്‍ സിങ് സുരക്ഷ ശക്തമാക്കാന്‍ നിര്‍ദേശം നല്‍കിയിരിക്കുന്നത്.