തിരുവനന്തപുരം: യെമനിൽ വധശിക്ഷയ്ക്കു വിധിച്ച മലയാളി നഴ്സ് നിമിഷപ്രിയയുടെ മോചനം സാധ്യമാകുമെന്നാണ് പ്രതീക്ഷയെന്ന് ഭർത്താവ് ടോമി തോമസ്. ഗവർണറെ ഉൾപ്പെടെ കാര്യങ്ങൾ ബോധിപ്പിച്ചതായി അദ്ദേഹം പറഞ്ഞു. സാധ്യമായതെല്ലാം ചെയ്യാമെന്ന് ഗവർണർ ഉറപ്പു നൽകി. കേന്ദ്ര-സംസ്ഥാന സർക്കാരുകൾ ഇടപെടുന്നുണ്ട്. മോചനം സാധ്യമാകുമെന്നാണ് പ്രതീക്ഷ. യെമൻ പൗരന്റെ കുടുംബം ദിയാധനം ഇതുവരെ ആവശ്യപ്പെട്ടിട്ടില്ല. ആവശ്യപ്പെട്ടാൽ നൽകാൻ തയാറാണ്. നിമിഷപ്രിയയുമായി ഫോണിൽ സംസാരിക്കുന്നുണ്ട്. പ്രതീക്ഷയോടെ കാത്തിരിക്കുകയാണെന്നും ടോമി പറഞ്ഞു.

ALSO READ: ശിക്ഷ നടപ്പാക്കാൻ ആറുദിവസം മാത്രം; നിമിഷപ്രിയക്കായി ഊര്‍ജിത നീക്കങ്ങള്‍

നേരത്തേ നിമിഷ പ്രിയയുടെ വിഷയം വളരെ സൂക്ഷ്മമായി നിരീക്ഷിച്ചുവരികയാണെന്ന് കേന്ദ്ര സർക്കാർ അറിയിച്ചിരുന്നു. പ്രാദേശിക അധികാരികളുമായും യെമൻ പൗരന്റെ കുടുംബാംഗങ്ങളുമായും ബന്ധപ്പെടുന്നുണ്ടെന്നും സാധ്യമായ എല്ലാ സഹായങ്ങളും ചെയ്തിട്ടുണ്ടെന്നും അധികൃതർ അറിയിച്ചിരുന്നു. എന്നാൽ നിമിഷ പ്രിയയുടെ വധശിക്ഷ നടപ്പാക്കുന്നതിനെക്കുറിച്ച് ഇന്ത്യൻ അധികൃതർക്കും കുടുംബത്തിനും ഇതുവരെ ഔദ്യോഗിക അറിയിപ്പുകളൊന്നും ലഭിച്ചിട്ടില്ലെന്നാണ് റിപ്പോർട്ടുകൾ വ്യക്തമാക്കുന്നത്.

യെമൻ പൗരന്റെ കുടുംബം ബ്ലഡ് മണി സ്വീകരിക്കുമെന്ന പ്രതീക്ഷയിലാണ് കുടുംബമെന്നും അദ്ദേഹം വ്യക്തമാക്കി. ഉന്നതതല ഇടപെടലുകളിൽ വിശ്വാസമുണ്ടെന്നും ടോമി തോമസ് കൂട്ടിച്ചേർത്തു.

ALSO READ: നിമിഷ പ്രിയയുടെ മോചനത്തിന് അടിയന്തര ഇടപെടൽ വേണം; രാഷ്ട്രപതിക്ക് കത്തയച്ച് വി.ഡി. സതീശൻ

നിമിഷപ്രിയയുടെ മോചനത്തിനായി നെന്മാറ എംഎൽഎ കെ. ബാബുവിന്റെ നേതൃത്വത്തിൽ 'സേവ് നിമിഷപ്രിയ ആക്ഷൻ കമ്മിറ്റി' രൂപീകരിച്ചിരുന്നു. നേരത്തേ, വധശിക്ഷ നടപ്പാക്കാനുള്ള തീരുമാനം അതീവ ദുഃഖകരവും ദൗർഭാഗ്യകരവുമാണെന്ന് കെ. ബാബു പ്രതികരിച്ചിരുന്നു. കേന്ദ്രസംസ്ഥാന സർക്കാരുകൾ വിഷയത്തിൽ സജീവമായി ഇടപെട്ടിട്ടുണ്ടെന്നും, എന്നാൽ യെമനിൽ എംബസി പ്രവർത്തനങ്ങൾ പരിമിതമാണെന്നും അദ്ദേഹം ചൂണ്ടിക്കാട്ടി. യെമനിലെ ഗോത്രസമുദായങ്ങളാണ് പ്രധാന തീരുമാനങ്ങൾ എടുക്കുന്നതെന്നും, ഇതുസംബന്ധിച്ച് നിരവധി ചർച്ചകൾ നടന്നിട്ടുണ്ടെന്നും എംഎൽഎ വ്യക്തമാക്കി.

Nimisha Priya’s husband has expressed renewed hope as efforts continue for her release from a Yemen prison. The Indian nurse faces a death sentence, but diplomatic talks and mercy petitions are ongoing.