തൊടുപുഴ: ആലക്കോട് ഗ്രാമപഞ്ചായത്ത് വൈസ് പ്രസിഡന്റായി യു.ഡി.എഫിലെ മുസ്‌ലിംലീഗ് പ്രതിനിധി സഫിയ മുഹമ്മദിനെ തെരഞ്ഞെടുത്തു. ഇന്നലെ രാവിലെ 11ന് നടന്ന തെരഞ്ഞെടുപ്പിന് റിട്ടേണിങ് ഓഫിസര്‍ രാജന്‍ മേല്‍നോട്ടം വഹിച്ചു. സഫിയ മുഹമ്മദിന്റെ പേര് കേരള കോണ്‍ഗ്രസിലെ ജയ്‌മോന്‍ നിര്‍ദേശിക്കുകയും കോണ്‍ഗ്രസിലെ ടോമി കാവാലം പിന്താങ്ങുകയും ചെയ്തു. എതിര്‍ സ്ഥാനാര്‍ഥിയായ എല്‍.ഡി.എഫിലെ ശ്രീജ ബാബുവിന്റെ പേര് ചന്ദ്രന്‍ നിര്‍ദേശിച്ചു. നാലിനെതിരെ ഒന്‍പതു വോട്ടുകള്‍ക്ക് സഫിയ മുഹമ്മദ് തെരഞ്ഞെടുക്കപ്പെട്ടു.
13 അംഗ ഗ്രാമപഞ്ചായത്തില്‍ യു.ഡി.എഫിന് ഒന്‍പതും എല്‍.ഡി.എഫിന് നാല് സീറ്റുമാണ് നിലവിലുള്ളത്. കോണ്‍ഗ്രസിലെ മിനി റെജിയാണ് ഗ്രാമപഞ്ചായത്ത് പ്രസിഡന്റ്. യു.ഡി.എഫില്‍ കോണ്‍ഗ്രസ് അഞ്ച്, കേരള കോണ്‍ഗ്രസ് മൂന്ന്, മുസ്‌ലിംലീഗ് ഒന്ന് എന്നിങ്ങനെയാണ് കക്ഷിനില. യു.ഡി.എഫിലെ ധാരണ പ്രകാരമാണ് സഫിയ മുഹമ്മദ് വൈസ് പ്രസിഡന്റ് സ്ഥാനത്തേക്ക് മത്സരിച്ചത്.