കോഴിക്കോട്: വെസ്റ്റ് ഹില്‍ സെന്റ് മൈക്കിള്‍സ് ഹയര്‍ സെക്കന്‍ഡറി സ്‌കൂളിന്റെ ഒരു വര്‍ഷം നീണ്ടുനില്‍ക്കുന്ന നവതി ആഘോഷം ഇന്നാരംഭിക്കും.
ഉച്ചയ്ക്ക് രണ്ടിന് സ്‌കൂള്‍ അങ്കണത്തില്‍ മേയര്‍ തോട്ടത്തില്‍ രവീന്ദ്രന്‍ ഉദ്ഘാടനം നിര്‍വഹിക്കുമെന്ന് പ്രിന്‍സിപ്പല്‍ സിസ്റ്റര്‍ സൂജയ വാര്‍ത്താസമ്മേളനത്തില്‍ അറിയിച്ചു.
കോഴിക്കോട് രൂപതാ ബിഷപ് ഡോ. വര്‍ഗീസ് ചക്കാലയ്ക്കല്‍ അധ്യക്ഷനാകും. ആഘോഷത്തിന്റെ ഭാഗമായി ഈ വര്‍ഷം മുതല്‍ സംസ്ഥാനതലത്തില്‍ നടത്തിവന്നിരുന്ന ബാസ്‌കറ്റ് ബോള്‍ ടൂര്‍ണമെന്റ് ദേശീയതലത്തിലേക്ക് ഉയര്‍ത്താന്‍ തീരുമാനിച്ചതായും അവര്‍ പറഞ്ഞു. പ്രവേശന കവാടം നവീകരിക്കല്‍, ഹൈടെക് ഓഡിറ്റോറിയം, സഹപാഠിക്കൊരു വീട്, ആധുനിക സജ്ജീകരണങ്ങളോട് കൂടിയ അടുക്കള, ഓപണ്‍ ഓഡിറ്റോറിയം എന്നിവയും നവതിയുടെ ഭാഗമായി സ്‌കൂളില്‍ നിര്‍മിക്കും.
വാര്‍ത്താസമ്മേളനത്തില്‍ പ്രധാനാധ്യാപിക സിസ്റ്റര്‍ ജയഷീല, സിസ്റ്റര്‍ ജെന്‍സി, പി.ടി.എ പ്രസിഡന്റ് ബെന്നി ജോസഫ്, സ്വാഗതസംഘം ചെയര്‍മാന്‍ എം. രാജന്‍ പങ്കെടുത്തു.