പാലക്കാട്: അട്ടപ്പാടിയില്‍ രണ്ടിടത്തായി ഇന്ന് പുലര്‍ച്ചെയുണ്ടായ ഉരുള്‍പൊട്ടലില്‍ വ്യാപക നാശനഷ്ടം. ആനക്കല്ലില്‍ നാലു വീടുകള്‍ ഭാഗികമായി തകര്‍ന്നു. ആളപായമുണ്ടായതായി റിപ്പോര്‍ട്ടില്ല.

പ്രദേശത്ത് മൂന്നു ദിവസമായി കനത്ത മഴ തുടരുകയാണ്. മഴയില്‍ മരങ്ങള്‍ വീണതും ഗട്ടര്‍ രൂപപ്പെട്ടതും മൂലം വാഹന ഗതാഗതം തടസപ്പെട്ടു. ഭവാനിപ്പുഴ നിറഞ്ഞു കവിഞ്ഞതിനാല്‍ പല ആദിവാസി കോളനികളും ഒറ്റപ്പെട്ട നിലയിലാണ്.

ഇടുക്കിയിലും മഴക്കെടുതി രൂക്ഷമായി. ഹൈറേഞ്ചില്‍ ഇന്നലെയും കനത്തമഴ തുടരുകയാണ്. നാല് ദിവസമായി തുടരുന്ന മഴയില്‍ വ്യാപക കൃഷിനാശവും മണ്ണിടിച്ചിലുമുണ്ടായി.


കനത്ത മഴ തുടരുന്നതിനാല്‍ കോഴിക്കോട്, വയനാട്, കോട്ടയം, ഇടുക്കി ജില്ലകളില്‍ രാത്രിയാത്ര ഒഴിവാക്കണമെന്ന് ദേശീയ ദുരന്ത നിവാരണ അതോറിറ്റി മുന്നറിയിപ്പ് നല്‍കി. കനത്ത മഴ രണ്ട് ദിവസംകൂടി തുടരാനുള്ള സാധ്യത കണക്കിലെടുത്താണ് നടപടി.