ചേളാരി: സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് ഈ അധ്യയന വര്‍ഷം മുതല്‍ പരിഷ്‌കരിച്ച പാഠപുസ്തകങ്ങളെ പരിചയപ്പെടുത്തല്‍, പാഠ്യപദ്ധതി സമീപനം, അധ്യാപക രക്ഷകര്‍തൃബന്ധം, ശിശു സൗഹൃദ പഠനം, പഠന നിലവാരം മെച്ചപ്പെടുത്തല്‍, മദ്‌റസ ശാക്തീകരണം എന്നിവയെകുറിച്ച് രക്ഷിതാക്കളെ ബോധവത്കരിക്കുന്നതിനുള്ള ഓറിയന്റേഷന്‍ ക്ലാസുകള്‍ ആരംഭിച്ചു.
വെളിമുക്ക് ആലുങ്ങല്‍ മദ്‌റസത്തുല്‍ ജന്നയില്‍ സമസ്ത കേരള ഇസ്‌ലാംമത വിദ്യാഭ്യാസ ബോര്‍ഡ് ജനറല്‍ സെക്രട്ടറി കോട്ടുമല ടി.എം ബാപ്പുമുസ്‌ലിയാര്‍ നിര്‍വഹിച്ചു.
സമസ്ത ജില്ലാ മുശാവറ മെമ്പര്‍ പി.എം മൊയ്തീന്‍കുട്ടി മുസ്‌ലിയാര്‍ അധ്യക്ഷനായി. കെ.കെ.എസ് തങ്ങള്‍ വെട്ടിച്ചിറ പ്രാര്‍ഥന നടത്തി. എസ്.കെ.ഐ.എം.വി ബോര്‍ഡ് സെക്രട്ടറി ഡോ. എന്‍.എ.എം അബ്ദുല്‍ ഖാദിര്‍ മദ്‌റസയിലെ പൊതുപരീക്ഷയിലെ റാങ്ക് ജേതാക്കള്‍ക്ക് അവാര്‍ഡുകള്‍ നല്‍കി. എസ്.കെ.ഐ.എം.വി ബോര്‍ഡ് ജനറല്‍ മാനേജര്‍ കെ.മോയിന്‍കുട്ടി മാസ്റ്റര്‍ ക്ലാസെടുത്തു.
സമസ്ത കേരള മദ്‌റസ മാനേജ്‌മെന്റ് അസോസിയേഷന്‍ ജനറല്‍ സെക്രട്ടറി കെ.എം അബ്ദുല്ല മാസ്റ്റര്‍ കൊട്ടപ്പുറം, എം.എ ഖാദര്‍, കുഞ്ഞിമൊയ്തീന്‍ മുസ്‌ലിയാര്‍, സയ്യിദ് ഹാമിദ് നിസാമി ജമലുല്ലൈലി, കെ.സിബ്ഗത്തുള്ള മുസ്‌ലിയാര്‍, ഇ.കെ കുഞ്ഞാപ്പു മാസ്റ്റര്‍, വി.പി അബ്ദുസ്സമദ് മദനി, ഹാജി.പി.കെ മുഹമ്മദ്, പി.സി അഹമ്മദ് ഹാജി പ്രസംഗിച്ചു. സിദ്ധീഖ് ഫൈസി സ്വാഗതവും വി.മൊയ്തീന്‍ നന്ദിയും പറഞ്ഞു. ബോര്‍ഡിന്റെ അംഗീകാരത്തോടെ പ്രവര്‍ത്തിക്കുന്ന മുഴുവന്‍ മദ്‌റസകളിലെയും രക്ഷിതാക്കള്‍ക്ക് മദ്‌റസ തലത്തിലാണ് ഓറിയന്റേഷന്‍ ക്ലാസുകള്‍ നടത്തുക.
വിദ്യാഭ്യാസ ബോര്‍ഡ് നിയോഗിച്ച 100 ഇന്‍സ്‌പെക്ടര്‍മാര്‍ ക്ലാസുകള്‍ക്ക് നേതൃത്വം നല്‍കും.