ശ്രീകൃഷ്ണപുരം: കെ.എസ്.കെ.ടി.യു ഏരിയ കമ്മറ്റിയുടെ നേതൃത്വത്തില്‍ കടമ്പഴിപ്പുറം വില്ലേജ് പരിധിയിലെ കല്ലടി പാടശേഖരത്തില്‍ രണ്ടര ഏക്കര്‍ സ്ഥലത്ത് നെല്‍ക്കൃഷിക്ക് തുടക്കമായി. പാട്ടത്തിനെടുത്ത ഭൂമിയില്‍ പൊന്മണി വിത്ത് ഉപയോഗിച്ചാണ് കൃഷി ഇറക്കിയിരിക്കുന്നത്.പാലക്കാട് ജില്ലയില്‍ യൂണിയന്‍ ജില്ലാ കമ്മറ്റിയുടെ നേതൃത്വത്തില്‍ വിവിധ ഏരിയാ കമ്മറ്റികള്‍ തരിശുഭൂമി ഏറ്റെടുത്ത് നെല്‍കൃഷി ചെയ്ത് മാതൃകകള്‍ കാണിക്കണമെന്ന നിര്‍ദ്ദേശത്തെ തുടര്‍ന്നാണ് ഏരിയാ കമ്മറ്റി ഈ രംഗത്ത് മുന്നോട്ടുവന്നിരിക്കുന്നത്. വിവിധ വില്ലേജ് കമ്മറ്റികളുടെ നേതൃത്വത്തില്‍ പത്ത് ഏക്കര്‍ സ്ഥലത്ത് നെല്‍കൃഷി ചെയ്യാനാണ് ലക്ഷ്യമിടുന്നത്.കടമ്പഴി പുറത്ത് നടന്ന നടീല്‍ ഉത്സവം യൂണിയന്‍ സംസ്ഥാന കമ്മിറ്റി അംഗം വി.കെ.ജയപ്രകാശ് ഉദ്ഘാടനം ചെയ്തു. ഏരിയാ പ്രസിഡന്റ് കെ.രാമചന്ദ്രന്‍ അധ്യക്ഷത വഹിച്ചു.പി.അരവിന്ദാക്ഷന്‍, പി.സുബ്രഹ്മണ്യന്‍, കെ.അംബുജാക്ഷി, ഒ.ബാലകൃഷ്ണന്‍, സി. കൃഷ്ണന്‍കുട്ടി, ടി.വാസുദേവന്‍, കെ.ഉണ്ണികൃഷ്ണന്‍ എന്നിവര്‍ സംസാരിച്ചു. കല്ലടി ശ്രീലതയുടെ നേതൃത്വത്തിലുള്ള തൊഴിലാളികളാണ് കൃഷിക്ക് നേതൃത്വം നല്‍കുന്നത്.