മണ്ണാര്‍ക്കാട്: ശക്തമായ മഴയില്‍ ഉരുള്‍പൊട്ടിയ കാഞ്ഞിരപ്പുഴ ഇരുമ്പകച്ചോലയിലെ രണ്ട് ആദിവാസി കോളനിക്കാരെ കൂടി ദുരിതാശ്വാസ ക്യാംപിലേക്ക് മാറ്റി. ഇതോടെ താലൂക്കില്‍ അട്ടപ്പാടിയില്‍ മൂന്ന് ദുരിതാശ്വാസ ക്യാംപടക്കം താലൂക്കില്‍ അഞ്ച് ക്യാമ്പുകളായി. ഇരുമ്പകച്ചോലയിലെ വെളളത്തോട് ആദിവാസി കോളനിയിലെ 35 ഓളം ആദിവാസി കുടുംബങ്ങളിലെ 130 പേരെ കുടുംബങ്ങളെ പുളിക്കല്‍ സ്‌കൂളിലേക്കും, പാമ്പന്‍കുന്ന് ആദിവാസി കോളനിക്ക് താഴെയുളള ആറോളം കുടുംബങ്ങളെ പൂഞ്ചോല അംഗന്‍വാടിയിലേക്കുമാണ് മാറ്റി താമസിപ്പിച്ചത്. അട്ടപ്പാടി കക്കുപടി എല്‍.പി സ്‌കൂള്‍, ഐ.ടി.ഡി.പി കാരുണ്യാശ്രയം, തൊട്ടിയാങ്കര ജെല്ലിപ്പാറയിലെ വാടക കെട്ടിടം എന്നിവിടങ്ങളിലാണ് അട്ടപ്പാടിയിലെ ദുരിതാശ്വാസ ക്യാംപുകള്‍.
അട്ടപ്പാടിയിലെ ദുരിതാശ്വാസ ക്യാംപുകളില്‍ 132 പേരാണുളളത്. അട്ടപ്പാടി തുരത്തിലെ ഒമ്പതാം വളവിലും പത്താം വളവിനുമിടയില്‍ മലയിടഞ്ഞ ഭാഗത്ത് ഇന്നലെ ആറു ജെ.സി.ബിയുടെ സഹായത്തോടെ മണ്ണ് നീക്കല്‍ നടത്തിയെങ്കിലും പൂര്‍ണ്ണമായും റോഡില്‍ നിന്നും കല്ലും മണ്ണും നീക്കാന്‍ കഴിഞ്ഞിട്ടില്ല. ഇവിടെ വീണ്ടും മലയിടിയാന്‍ സാധ്യതയേറെയാണെന്നാണ് വിദഗ്ധരുടെ അഭിപ്രായം. ഇന്ന് ഉച്ചയോടെ ഭാഗികമായി ഗതാഗതം പുനസ്ഥാപിക്കാന്‍ കഴിയുമെന്നാണ് അധികൃതര്‍ പറയുന്നത്.
രണ്ട് ദിവസം കൂടി കഴിഞ്ഞാലെ അട്ടപ്പാടി ചുരത്തിലൂടെ ഗതാഗതം പൂര്‍ണ്ണമായും പുനസ്ഥാപിക്കാനാവുകയൊളളുവെന്നാണ് കരുതുന്നത്.
പ്രകൃതിക്ഷോഭത്തില്‍ താലൂക്കില്‍ ഒരു ജീവന്‍ പൊലിയുകയും, അഞ്ച് പേരുകള്‍ക്ക് പരിക്കേല്‍ക്കുകയും ചെയ്തിട്ടുണ്ടെന്നാണ് ഔദ്ദ്യോഗിക കണക്ക്. 11 വീടുകള്‍ പൂര്‍ണ്ണമായും 298 വീടുകള്‍ ഭാഗികമായി തകര്‍ന്നിട്ടുണ്ട്. 40 കിണറുകളും നിലംപൊത്തി. മേഖലയില്‍ മാത്രം 25 റോഡുകള്‍ തകര്‍ന്നതായാണ് കണക്ക്. റോഡ് നവീകരിക്കാന്‍ 35 ലക്ഷം വരുമെന്നാണ് അധികൃതര്‍ നല്‍കിയ പ്രാഥമിക കണക്ക്. ദുരിത ബാധിത പ്രദേശങ്ങളും മലയിടിഞ്ഞ അട്ടപ്പാടി ചുരം റോഡും ഇന്നലെ വൈകീട്ടോടെ ജില്ലാ കലക്ടര്‍ ഡോ. സുരേഷ് ബാബൂ ഐ.എ.എസ് സന്ദര്‍ശിച്ചു.
കൂടാതെ ബ്ലോക്ക് പഞ്ചായത്ത് പ്രസിഡന്റ് യൂസഫ് പാലക്കല്‍, വൈസ പ്രസിഡന്റ് വി.പ്രീത, ജനപ്രതിനിദികളായടി.കെ ഫൈസല്‍, രാജന്‍ ആമ്പാടത്ത്, ഒ.പി ശരീഫ് തുടങ്ങിയവരും അട്ടപ്പാടി ചുരത്തിലെ മലയിടിഞ്ഞ ഭാഗം സന്ദര്‍ശിച്ചു.