മലപ്പുറം: വേങ്ങര ഉപതെരഞ്ഞെടുപ്പില്‍ പത്രികാസമര്‍പ്പണം ഇന്നുകൂടി. ഇന്നു വൈകീട്ട് അഞ്ചുവരേയാണ് പത്രികനല്‍കാനുള്ള സമയം. ഇന്നലെ ശിവസേന സ്ഥാനാര്‍ഥി എ ശിവദാസ് പത്രിക നല്‍കി. ഇതുവരേ ആറുപേരാണ് പത്രിക സമര്‍പ്പിച്ചത്. ഇന്നു ബി.ജെ.പി സ്ഥാനാര്‍ഥി കൂടി പത്രികനല്‍കും. സൂക്ഷ്മ പരിശോധന 25ന് തിങ്കളാഴ്ച നടക്കും. 27 വരെ പത്രിക പിന്‍വലിക്കാം.

വോട്ടര്‍പട്ടിക തയാറായി

തിരുരങ്ങാടി: വേങ്ങര ഉപതെരഞ്ഞെടുപ്പുമായി ബന്ധപ്പെട്ട രാഷ്ട്രീയ പാര്‍ട്ടികള്‍ക്കും സ്ഥാനാര്‍ഥികള്‍ക്കുമുള്ള വോട്ടര്‍പട്ടിക തയാറായതായി ഇ.ആര്‍.ഒ കൂടിയായ തിരൂരങ്ങാടി താലൂക്ക് തഹസില്‍ദാര്‍ അറിയിച്ചു. തെരഞ്ഞെടുപ്പുമായി ബന്ധപ്പെട്ട ഡ്യൂട്ടിക്ക് നിയോഗിച്ചിട്ടുള്ള ഉദ്യോഗസ്ഥര്‍ക്കുള്ള ക്ലാസ് നാളെ രാവിലേയും ഉച്ചക്കുമായി നടക്കും. മലപ്പുറം, കോട്ടക്കല്‍, കൊണ്ടോട്ടി, വള്ളിക്കുന്ന്, തിരൂരങ്ങാടി മണ്ഡലങ്ങളില്‍നിന്നും ഡ്യൂട്ടിക്ക് നിയോഗിച്ചിട്ടുള്ള ജീവനക്കാര്‍ക്കുള്ള ആദ്യഘട്ട പരിശീലനം അതാത് മണ്ഡലത്തില്‍വച്ചാണ് നടക്കുക.