തിരുവനന്തപുരം: ചികിത്സ നിഷേധിച്ചതിനെ തുടര്‍ന്ന് വാഹനാപകടത്തില്‍ പരുക്കേറ്റ തമിഴ്‌നാട് സ്വദേശി മുരുകന്‍ മരിക്കാനിടയായ സംഭവത്തില്‍ അന്വേഷണ റിപ്പോര്‍ട്ട് സമര്‍പ്പിക്കാത്ത ആരോഗ്യവകുപ്പ് സെക്രട്ടറിക്കും ഡി.ജി.പിക്കും സംസ്ഥാന മനുഷ്യാവകാശ കമ്മിഷന്റെ വിമര്‍ശനം.
ഗൗരവതരമായ മനുഷ്യാവകാശ വിഷയമായിട്ടും റിപ്പോര്‍ട്ട് ഹാജരാക്കാത്ത നടപടി തൃപ്തികരമല്ലെന്ന് കമ്മിഷന്‍ വിമര്‍ശിച്ചു. റിപ്പോര്‍ട്ട് ഹാജരാക്കാന്‍ അവസാന അവസരമെന്ന നിലയില്‍ ഡി.ജി.പിക്കും ആരോഗ്യ സെക്രട്ടറിക്കും ഒരിക്കല്‍ കൂടി നോട്ടിസയക്കാനും കമ്മിഷന്‍ അംഗം കെ. മോഹന്‍കുമാര്‍ ഉത്തരവായി.
ആരോഗ്യ സെക്രട്ടറി, ഡി.ജി.പി, കൊല്ലം ജില്ലാ പോലിസ് മേധാവി എന്നിവരില്‍ നിന്നുമാണ് കമ്മിഷന്‍ റിപ്പോര്‍ട്ട് ആവശ്യപ്പെട്ടത്. എന്നാല്‍ ചാത്തന്നൂര്‍ അസിസ്റ്റന്റ് കമ്മിഷണര്‍ മാത്രമാണ് റിപ്പോര്‍ട്ട് സമര്‍പ്പിച്ചത്. കൊല്ലം ക്രൈംബ്രാഞ്ച് അസിസ്റ്റന്റ് കമ്മിഷണര്‍ സംഭവത്തെക്കുറിച്ച് അന്വേഷിച്ച് വരികയാണെന്ന് മാത്രമാണ് പ്രസ്തുത റിപ്പോര്‍ട്ടിലുള്ളത്. ആരോഗ്യ സെക്രട്ടറിക്കും ഡി.ജി.പിക്കും ഓര്‍മ്മ കുറിപ്പുകള്‍ അയച്ചിട്ടും റിപ്പോര്‍ട്ട് ഹാജരാക്കാത്ത പശ്ചാത്തലത്തിലാണ് വിമര്‍ശനം. മനുഷ്യാവകാശ പ്രവര്‍ത്തകനായ പി.കെ. രാജു സമര്‍പ്പിച്ച പരാതിയിലാണ് നടപടി. കേസ് ഒക്‌ടോബര്‍ 17ന് വീണ്ടും പരിഗണിക്കും.