ബംഗളുരു: ഭീകരരില്‍ നിന്നും മോചിതനായ ഫാ.ടോം ഉഴുന്നാലില്‍ ബംഗളുരുവിലെത്തി. ഡല്‍ഹിയില്‍ നിന്ന് ഇന്ന് രാവിലെ 8.35 ഓടെയാണ് അദ്ദേഹം ബംഗളുരു വിമാനത്താവളത്തിലെത്തിയത്.

ഉച്ചയ്ക്ക് കര്‍ദിനാള്‍മാരുമായും സി.ബി.സി.ഐ. നേതാക്കളുമായും അദ്ദേഹം കൂടിക്കാഴ്ച നടത്തും. ഞായറാഴ്ച കൊച്ചിയിലെത്തുന്ന ഉഴുന്നാലില്‍ വൈകീട്ട് പാലാ രാമപുരത്തെത്തും. ചൊവ്വാഴ്ച മുഖ്യമന്ത്രി പിണറായി വിജയനുമായും മറ്റുമന്ത്രിമാരുമായും അദ്ദേഹം കൂടിക്കാഴ്ച നടത്തുന്നുണ്ട്.

യമനിലെ തീവ്രവാദികളുടെ പിടിയില്‍ നിന്ന് മോചിതനായ ഫാ. ടോം ഉഴുന്നാലില്‍ ഇന്നലെയാണ് ഇന്ത്യയില്‍ തിരിച്ചെത്തിയത്. രാവിലെ ഏഴരയോടെ റോമില്‍ നിന്നുള്ള എയര്‍ ഇന്ത്യ വിമാനത്തില്‍ ഡല്‍ഹി ഇന്ദിരാഗാന്ധി രാജ്യാന്തര വിമാനത്താവളത്തില്‍ എത്തിയ അദ്ദേഹത്തെ കേന്ദ്രമന്ത്രി അല്‍ഫോന്‍സ് കണ്ണന്താനത്തിന്റെ നേതൃത്വത്തില്‍ കേരളത്തില്‍ നിന്നുള്ള എം.പിമാരും വിവിധ സഭാ പ്രതിനിധികളും ചേര്‍ന്നു സ്വീകരിച്ചു. വത്തിക്കാനിലെ ഇന്ത്യന്‍ നയതന്ത്ര ഉദ്യോഗസ്ഥനും സലേഷ്യന്‍ സഭാ പ്രതിനിധികളും അദ്ദേഹത്തെ അനുഗമിച്ചിരുന്നു.