ദമാം: സഊദിയില്‍ വാഹനാപകടത്തില്‍ മരിച്ച മകന്റെ മൃതദേഹം കാത്തിരുന്ന പാകിസ്താന്‍ കുടുംബത്തിന് ലഭിച്ചത് ഫിലിപ്പിനോ യുവാവിന്റെ മൃതദേഹം. സഊദിയില്‍ നിന്നും പാകിസ്താനിലേക്കയച്ച മൃതദേഹമാണ് ഗുരുതര പിഴവ് മൂലം മറ്റൊരു രാജ്യത്തെ പൗരന്റെതായത്. സംഭവത്തെ കുറിച്ച് അധികൃതര്‍ അന്വേഷിക്കാന്‍ ഉത്തരവിട്ടതായാണ് വിവരം. കഴിഞ്ഞയാഴ്ചയാണ് പാകിസ്താന്‍ സ്വദേശിയായ 22 കാരന്‍ കിഴക്കന്‍ പ്രവിശ്യയിലെ ദമാമില്‍ നടന്ന ഒരു അപകടത്തില്‍ മരിച്ചത്.
നിയമ നടപടികളെല്ലാം പൂര്‍ത്തിയാക്കി മകന്റെ മൃതദേഹം നാട്ടിലേക്കയക്കാന്‍ ബന്ധുക്കള്‍ അനുമതി നല്‍കിയിരുന്നു. ഇത് പ്രകാരം സഊദിയിലുള്ള സുഹൃത്തുക്കളും മറ്റും ചേര്‍ന്ന് പെട്ടെന്ന് തന്നെ നിയമ നടപടികള്‍ പൂര്‍ത്തിയാക്കി മൃതദേഹം പാകിസ്താനിലേക്ക് അയക്കുകയും ചെയ്തു. മകന്റെ മുഖം അവസാനമായി ഒരു നോക്ക് കാണാനായി കാത്തിരുന്ന മാതാപിതാക്കളടക്കമുള്ള കുടുംബങ്ങള്‍ മൃതദേഹത്തിന്റെ മുഖം തുറന്നപ്പോഴാണ് മുന്നില്‍ കിടക്കുന്നത് തങ്ങളുടെ മകനല്ലെന്നും ഫിലിപ്പൈന്‍ പൗരനായ ഒരാളുടെ മൃതദേഹമാണെന്നു തിരിച്ചറിഞ്ഞതെന്ന് പാക്കിസ്താന്‍ റേഡിയോ ടി.എന്‍ റിപ്പോര്‍ട്ട് ചെയ്തു.
തങ്ങളുടെ മകന്റെ മൃതതുദേഹം വിട്ടു കിട്ടാന്‍ വേണ്ടണ്ട നടപടികള്‍ കൈക്കൊള്ളാന്‍ കുടുംബം സഊദിയിലെ പാകിസ്താന്‍ അംബാസിഡറോട് ആവശ്യപ്പെട്ടിട്ടുണ്ടണ്ട്. അലക്ഷ്യമായി മറ്റൊരു മൃതശരീരം പൊതിഞ്ഞയച്ച ആശുപത്രിക്കെതിരേ നിയമ നടപടികള്‍ സ്വീകരിക്കണമെന്നും കുടുംബം നല്‍കിയ പരാതിയില്‍ ആവശ്യപ്പെട്ടു.