അങ്കാറ: ഇറാഖിനെ വെട്ടിക്കീറി കുര്‍ദുകള്‍ക്ക് പ്രത്യേക ഭരണപ്രദേശമുണ്ടാക്കാനുള്ള ശ്രമത്തിനെതിരെ നടപടിയെടുക്കാന്‍ ഇറാന്‍ പ്രസിഡന്റ് ഹസന്‍ റൂഹാനിയെ കൂട്ടുപിടിച്ച് തുര്‍ക്കി പ്രസിഡന്റ് റജബ് ത്വയ്യിബ് ഉര്‍ദുഗാന്‍. ഇക്കാര്യത്തില്‍ കൂടുതല്‍ ഊര്‍ജ്ജിതമായ നടപടികള്‍ ഉണ്ടാവുമെന്ന് ഉര്‍ദുഗാന്‍ റൂഹാനിയുമായി ചേര്‍ന്നു നടത്തിയ വാര്‍ത്താസമ്മേളനത്തില്‍ പറഞ്ഞു.

എന്നാല്‍ എന്തു നടപടിയാണ് എടുക്കാന്‍ പോകുന്നതെന്ന് അദ്ദേഹം വ്യക്തമാക്കിയിട്ടില്ല. നേരത്തെ, കുര്‍ദ് ദേശത്തേക്കുള്ള അതിര്‍ത്തി അടയ്ക്കുമെന്ന് തുര്‍ക്കി മുന്നറിയിപ്പു നല്‍കിയിരുന്നു.

''ഇത് നിയമവിരുദ്ധമായ ഹിതപരിശോധനയാണ്, ഇത് ഞങ്ങള്‍ സ്വീകരിക്കില്ല. എന്ത് ഹിതപരിശോധനയാണ് അവര്‍ നടപ്പിലാക്കുന്നത്?''- ഉര്‍ദുഗാന്‍ ചോദിച്ചു.

ഇസ്‌റാഈല്‍ ചാര ഏജന്‍സി മൊസാദിന്റെ പിന്തുണയോടെയാണ് ഹിതപരിശോധനാ ആവശ്യമുന്നയിക്കുന്നതെന്നും ഉര്‍ദുഗാന്‍ കുറ്റപ്പെടുത്തി. ഇസ്‌റാഈല്‍ ചാര ഏജന്‍സി മൊസാദുമായി ചേര്‍ന്ന് സ്വയം കൊണ്ടുവന്ന ഹിതപരിശോധന അനുവദിക്കില്ലെന്നും ഉര്‍ദുഗാന്‍ വ്യക്തമാക്കി.

ഇറാഖിന്റെയും അതുപോലെ, സിറിയയുടെയും ശിഥിലീകരണത്തെ എതിര്‍ക്കാന്‍ തുര്‍ക്കിയും ഇറാനും ഒന്നിക്കുകയാണെന്നും ഉര്‍ദുഗാന്‍ വ്യക്തമാക്കി.