ഹൈദരാബാദ്: വ്യാവസായ ശാലകളില്‍ നിന്ന് പുറന്തള്ളുന്ന രാസമാലിന്യം കാരണം തടാകത്തില്‍ മത്സ്യങ്ങള്‍ ചത്തുപൊന്തുന്നതായി പരാതി. ശങ്കര്‍ റെഡ്ഡി ജില്ലയിലെ കാസിപ്പള്ളി ഇന്‍ഡസ്ട്രീസ് എസ്‌റ്റേറ്റിലുള്ള 30 വ്യാവസായിക ശാലകളില്‍ നിന്നുള്ള രാസമാലിന്യങ്ങളാണ് ഗാന്ധികുടം തടാകത്തിലേക്ക് ഒഴുക്കി വിടുന്നത്. ഇതിനകം ഏതാണ്ട് 10 കോടി രൂപയുടെ മത്സ്യങ്ങള്‍ നശിച്ചിട്ടുണ്ടെന്നാണ് വിലയിരുത്തല്‍. പരാതിയുടെ അടിസ്ഥാനത്തില്‍ കമ്പനികള്‍ക്കെതിരേ പൊലിസ് കേസെടുത്തിട്ടുണ്ട്. ഇക്കഴിഞ്ഞ മൂന്നിനുണ്ടായ കനത്ത മഴയുടെ സമയത്താണ് രാസമാലിന്യം ആരുമറിയാതെ തടാകത്തിലേക്ക് തള്ളിയതെന്നാണ് വിവരം. 266 ഏക്കര്‍ വരുന്ന തടാകത്തിലെ 80 ശതമാനം മത്സ്യങ്ങളും ചത്തുവെന്നാണ് പരിസ്ഥിതി പ്രവര്‍ത്തകര്‍ പറയുന്നത്.