മാഡ്രിഡ്: സ്വതന്ത്ര രാജ്യമെന്ന നിലയില്‍ മുമ്പോട്ടുപോകുമെന്ന കാറ്റലണ്‍ പ്രസിഡന്റിന്റെ പ്രഖ്യാപനം വന്നതിനു പിന്നാലെ, അതില്ലാതാക്കാനുള്ള ശ്രമം തുടങ്ങിയിരിക്കുകയാണ് സ്‌പെയിന്‍. സ്വതന്ത്രമാക്കുന്നതുമായി ബന്ധപ്പെട്ട ഭരണഘടനാ അനുച്ഛേദം ഉണ്ടാക്കുന്നതിനു മുമ്പ് സ്വാതന്ത്ര്യം പ്രഖ്യാപിച്ചോയെന്ന് കാറ്റലന്‍ നേതാക്കന്മാന്‍ വ്യക്തമാക്കണമെന്ന് സ്‌പെയിന്‍ പ്രധാനമന്ത്രി മരിയാന റജോയ് ആവശ്യപ്പെട്ടു.

കാറ്റലണ്‍ മേഖലാ പ്രസിഡന്റ് കാര്‍ലെസ് പുജിമൊന്റെ പ്രതികരണം പോലെയിരിക്കും ഭാവി നടപടികളെന്നും അദ്ദേഹം മുന്നറിയിപ്പു നല്‍കി. പാര്‍ലമെന്റിനെ അഭിസംബോധന ചെയ്തു സംസാരിക്കുകായായിരുന്നു മരിയാന റജോയ്.

കാറ്റലണ്‍ സര്‍ക്കാര്‍ സ്വാതന്ത്ര്യം പ്രഖ്യാപിച്ചോ ഇല്ലയോ എന്ന് സ്ഥിരീകരിക്കാന്‍ കാബിനറ്റ് ഔദ്യോഗികമായി ആവശ്യപ്പെടുകയാണെന്നും അദ്ദേഹം പറഞ്ഞു. സര്‍ക്കാര്‍ ഭരണഘടനയുടെ 155-ാം വകുപ്പ് ഉപയോഗിക്കുമെന്നും അദ്ദേഹം മുന്നറിയിപ്പു നല്‍കി. നിയമ ഉടമ്പടികള്‍ പാലിക്കുന്നില്ലെങ്കില്‍ കേന്ദ്ര സര്‍ക്കാരിന് മേഖലാ സര്‍ക്കാരുകളെ നേരിട്ട് നിയന്ത്രിക്കാമെന്ന് അനുശാസിക്കുന്നതാണ് സ്പാനിഷ് ഭരണഘടനയുടെ 155-ാം വകുപ്പ്.

നേരത്തെ, കാറ്റലോണിയയെ സ്വതന്ത്ര രാജ്യമായി പ്രഖ്യാപിക്കുമെന്ന് വാര്‍ത്തയുണ്ടായിരുന്നുവെങ്കിലും കാറ്റലോണിയ അതില്‍ നിന്നു പിന്മാറിയിരുന്നു. പകരം, സ്വാതന്ത്ര്യം പിന്നീടു പ്രഖ്യാപിക്കുമെന്ന നിലപാടാണ് പുജിമൊന്‍ പ്രഖ്യാപിച്ചത്. സ്‌പെയിനുമായി ചര്‍ച്ച തുടരുന്നതിനാലാണ് ഇതെന്നായിരുന്നു പുജിമൊന്റെ വാദം. എന്നാല്‍ ഭരണഘടനയിലെ നിയമസാധ്യത സ്‌പെയിന്‍ കേന്ദ്ര സര്‍ക്കാര്‍ ഉപയോഗിക്കുമെന്ന് മുന്‍കൂട്ടി കണ്ടാണ് പുജിമൊന്‍ നീക്കം മാറ്റിയതെന്നാണ് വിവരം.