പട്‌ന: സര്‍ക്കാര്‍ ആശുപത്രിയില്‍നിന്ന് ആംബുലന്‍സ് അനുവദിക്കാത്തതിനെ തുടര്‍ന്ന് മകളുടെ മൃതദേഹവുമായി പിതാവ് നടന്നതു നാലു കിലോമീറ്റര്‍. ബിഹാറിലെ ലാകിസരായ് ജില്ലയിലെ കജ്ര ഗ്രാമത്തിലെ രാംബലാകാണ് ഒന്‍പതുകാരിയായ മകള്‍ റൗഷാന്‍ കുമാരിയുടെ മൃതദേഹം തോളിലേറ്റി നടന്നത്.
കടുത്ത പനിയെ തുടര്‍ന്ന് ആറു ദിവസം പട്‌നയിലെ ഓള്‍ ഇന്ത്യാ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സസില്‍ ചികിത്സയിലായിരുന്ന റൗഷാന്‍ കുമാരി കഴിഞ്ഞ ദിവസമാണ് മരിച്ചത്. മൃതദേഹം വീട്ടിലെത്തിക്കുന്നതിനായി മാതാപിതാക്കള്‍ ആംബുലന്‍സ് ആവശ്യപ്പെട്ടെങ്കിലും ആശുപത്രി അധികൃതര്‍ ആദ്യം വരിയില്‍ നിര്‍ത്തുകയും പിന്നീട് ആംബുലന്‍സ് നിഷേധിക്കുകയും ചെയ്യുകയായിരുന്നെന്നു കുട്ടിയുടെ കുടുംബം പറയുന്നു. കൈയില്‍ ആവശ്യത്തിനു പണമില്ലാത്തതിനെ തുടര്‍ന്നു ഗത്യന്തരമില്ലാതെ പിതാവ് മകളുടെ മൃതദേഹം തോളിലേറ്റി നടന്നു.
അതേസമയം, ഗുരുതരാവസ്ഥയില്‍ ആശുപത്രിയിലെത്തിച്ച മകളെ രജിസ്‌ട്രേഷന്‍ കാര്‍ഡില്ലാതെ പരിശോധിക്കാന്‍ തയാറായില്ലെന്നും നീണ്ട വരിയില്‍ നിന്നിരുന്നവരോടു തന്നെ മുന്നോട്ടുവിടാന്‍ കേണപേക്ഷിച്ചിട്ടും ജനങ്ങളും ആശുപത്രി ജീവനക്കാരും ചെവിക്കൊണ്ടില്ലെന്നും കുട്ടിയുടെ പിതാവ് പറയുന്നു.
എന്നാല്‍, അത്തരമൊരു സംഭവം അറിഞ്ഞിരുന്നില്ലെന്നും വിഷയത്തില്‍ അന്വേഷണം നടത്തുമെന്നും എയിംസ് അധികൃതര്‍ അറിയിച്ചു.