കോഴിക്കോട്: സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ നയിക്കുന്ന ജനജാഗ്രതായാത്ര വിവാദത്തില്‍. ഹവാല-സ്വര്‍ണക്കടത്തു കേസുകളില്‍ പൊലിസ് മുന്‍പ് അറസ്റ്റ് ചെയ്ത പ്രതി കാരാട്ട് ഫൈസലിന്റെ ആഡംബര കാറില്‍ യാത്ര ചെയ്‌തെന്ന ആരോപണമാണ് പുതിയ വിവാദത്തിന് വഴിതെളിയിച്ചിരിക്കുന്നത്.
കോഴിക്കോട് ജില്ലയിലെ കൊടുവള്ളിയില്‍ ഇന്നലെ നല്‍കിയ സ്വീകരണത്തിലാണ് കോടിയേരി വിവാദ യാത്ര നടത്തിയത്. ഫൈസലിന്റെ ഉടമസ്ഥതയിലുള്ള ബി.എം.ഡബ്ല്യു കാറാണ് ഇതിനായി ഉപയോഗിച്ചത്. പ്രമാദമായ കരിപ്പൂര്‍ സ്വര്‍ണക്കടത്ത് കേസില്‍ റവന്യൂ ഇന്റലിജന്‍സ് ഉദ്യോഗസ്ഥര്‍ അറസ്റ്റ് ചെയ്ത പ്രതിയാണ് ഫൈസല്‍. കൊടുവള്ളി മുനിസിപ്പാലിറ്റിയിലെ സി.പി.എം പ്രതിനിധികൂടിയാണ് ഇയാള്‍.
ഹവാല കേസ് പ്രതിയുടെ വാഹനത്തില്‍ കോടിയേരി യാത്ര ചെയ്തത് അന്വേഷിക്കണമെന്നും ഹവാല ഇടപാടുകാരുടെ സംവിധാനങ്ങള്‍ ഉപയോഗിച്ചാണ് കോടിയേരി യാത്ര നടത്തുന്നതെന്നും മുസ്‌ലിം ലീഗ് സംസ്ഥാന സെക്രട്ടറി എം.സി മായിന്‍ ഹാജിയും യൂത്ത്‌ലീഗ് സംസ്ഥാന സീനിയര്‍ വൈസ് പ്രസിഡന്റ് നജീബ് കാന്തപുരവും പറഞ്ഞു. കാരാട്ട് റസാഖ് എം.എല്‍.എ യുടെ മകന്‍ പൊലിസിന്റെ സഹായത്തോടെ ഹവാലയുടെ അധോലോക നേതാവായത് അന്വേഷിക്കണമെന്നും നേതാക്കള്‍ പത്രസമ്മേളനത്തില്‍ ആവശ്യപ്പെട്ടു.
എന്നാല്‍ കോടിയേരി ബാലകൃഷ്ണന്‍ മുനിസിപ്പല്‍ കൗണ്‍സിലര്‍ കാരാട്ട് ഫൈസലിന്റെ കാറില്‍ യാത്രചെയ്തതിനെ തെറ്റിദ്ധാരണ പരത്തുന്ന രീതിയില്‍ ചിത്രീകരിക്കാനാണ് ബി.ജെ.പിയോടൊപ്പം ചേര്‍ന്ന് ചില കേന്ദ്രങ്ങള്‍ ശ്രമിക്കുന്നതെന്ന് പി.ടി.എ റഹീം എം.എല്‍.എ അറിയിച്ചു.