കുറ്റ്യാടി: ബൈക്കപകടത്തില്‍ മരിച്ച നിട്ടൂര്‍ തൊടുവളപ്പില്‍ നടുക്കണ്ടി മുഹമ്മദ് വിടപറഞ്ഞത് ഒത്തിരി സ്വപ്നങ്ങള്‍ ബാക്കിയാക്കി.കംപ്യുട്ടര്‍ എന്‍ജിനീയറിങ്ങില്‍ ബി.ടെക് ബിരുദധാരിയായ മുഹമ്മദ് കോഴിക്കോട്ടെ സ്വകാര്യ സ്ഥാപനത്തില്‍ ജോലിചെയ്തു വരികയായിരുന്നു. അടുത്തമാസം ബംഗളൂരുവില്‍ ഉയര്‍ന്ന ജോലിക്കു പോകാന്‍ തയാറെടുക്കുന്നതിനിടെയാണ് അപകടത്തിന്റെ രൂപത്തില്‍ വിധി തട്ടിയെടുത്തത്.
ജോലി ആവശ്യാര്‍ഥം ആയഞ്ചേരിയില്‍നിന്ന് അപേക്ഷാ ഫോമും വാങ്ങി തിരിച്ചുവരികയായിരുന്ന മുഹമ്മദ് സഞ്ചരിച്ച ബൈക്ക് പോക്കറ്റ് റോഡില്‍നിന്നു കയറിയ മറ്റൊരു ബൈക്കുമായി കൂട്ടിയിടിക്കുകയായിരുന്നു. അപകടത്തില്‍ സാരമായി പരുക്കേറ്റ മുഹമ്മദിനെ നാട്ടുകാര്‍ വടകര സ്വകാര്യ ആശുപത്രിയിലും തുടര്‍ന്ന് കോഴിക്കോട്ടെ പ്രമുഖ സ്വകാര്യ ആശുപത്രിയിലും എത്തിച്ചെങ്കിലും ഇന്നലെ ഉച്ചയോടെ മരണത്തിനു കീഴടങ്ങുകയായിരുന്നു.
ചെറുപ്രായത്തില്‍ തന്നെ തികഞ്ഞ ദീനിസ്‌നേഹിയായിരുന്ന മുഹമ്മദ് ഉംറക്ക് പോകാനുള്ള തയാറെടുപ്പും നടത്തിയിരുന്നു. സ്‌കൂള്‍ വിദ്യാഭ്യാസ കാലം മുതല്‍ മികച്ച പഠനനിലവാരം പുലര്‍ത്തിയ മുഹമ്മദ് ഉയര്‍ന്ന മാര്‍ക്കോടെയാണ് ബി.ടെക് ബിരുദം നേടിയത്. നാട്ടുകാരുടെ സ്‌നേഹാദരങ്ങള്‍ പിടിച്ചുപറ്റാനും മുഹമ്മദിന് കഴിഞ്ഞു.
എം.എസ്.എഫിന്റെയും സമസ്തയുടെയും പ്രവര്‍ത്തകനായ മുഹമ്മദ് നാട്ടിലെ പൊതുപ്രവര്‍ത്തനങ്ങളിലും സജീവ സാന്നിധ്യമായിരുന്നു. കോഴിക്കോട് മെഡിക്കല്‍ കോളജിലെ പോസ്റ്റ്‌മോട്ടത്തിനു ശേഷം മയ്യിത്ത് ഇന്നു ഒന്നരയോടെ നിട്ടൂര്‍ ജുമുഅത്ത് പള്ളി ഖബര്‍സ്ഥാനില്‍ മറവു ചെയ്യും.