നരിക്കുനി: മടവൂരില്‍ കാരാട്ട് റസാഖ് എം.എല്‍.എയ്‌ക്കെതിരേ യൂത്ത് ലീഗ്, എം.എസ്.എഫ് പ്രവര്‍ത്തകരുടെ കരിങ്കൊടി. എം.എല്‍.എയുടെ ആസ്തി വികസന ഫണ്ടില്‍നിന്ന് അനുവദിച്ച ഹൈമാസ്റ്റ് ലൈറ്റിന്റെ ഉദ്ഘാടനത്തിന് എത്തിയതായിരുന്നു എം.എല്‍എ. താമരശേരി സ്റ്റേഡിയം നിര്‍മാണവുമായി ബന്ധപ്പെട്ട അഴിമതി ആരോപണത്തിലും കൊടുവള്ളി കെ.എം.ഒ കോളജില്‍ എം.എസ്.എഫ് പ്രവര്‍ത്തകരെ മര്‍ദിച്ച സംഭവത്തിലും പ്രതിഷേധിച്ചായിരുന്നു കരിങ്കൊടി കാട്ടിത്. കനത്ത പൊലിസ് സന്നാഹവും സ്ഥലത്തുണ്ടായിരുന്നു.
സംഭവത്തില്‍ യൂത്ത് ലീഗ്, എം.എസ്.എഫ് പ്രവര്‍ത്തകരായ റാഫി ചെരച്ചോറ, യൂസുഫലി, മുനീര്‍ പുതുക്കുടി, അനീസ് രാംപൊയില്‍, പി.പി ജുനൈസ്, നവാസ് ഇല്ലത്ത്, അബ്ദുറഹ്മാന്‍ മടവൂര്‍ മുക്ക്, അഡ്വ. കെ.ടി ജാസിം, യാസര്‍ തുടങ്ങിയ പതിനേഴു പേരെ കുന്ദമംഗലം പൊലിസ് അറസ്റ്റ് ചെയ്തു. ഇവരെ പിന്നീട് ജാമ്യത്തില്‍ വിട്ടു.
തുടര്‍ന്ന് മടവൂര്‍ ടൗണില്‍ പ്രതിഷേധ പ്രകടനവും എം.എല്‍.എയുടെ കോലം കത്തിക്കലും നടന്നു. പൊലിസ് നടപടില്‍ പഞ്ചായത്ത് എം.എസ്.എഫ്, യൂത്ത് ലീഗ് പ്രതിഷേധം രേഖപ്പെടുത്തി.