രാജപുരം: യു.എ.ഇയിലെ റാസല്‍ ഖൈമയില്‍ ഉണ്ടായ വാഹനാപകടത്തില്‍ ഗുരുതരമായി പരുക്കേറ്റ് ദീര്‍ഘകാലമായി ആശുപത്രികളില്‍ കഴിയുകയായിരുന്ന കൊട്ടോടിയിലെ അര്‍ച്ചനയെ കഴിഞ്ഞ ദിവസം ആടകത്തെ വീട്ടിലെത്തിച്ചു. വീട്ടിലെ അന്തരീക്ഷവും ബന്ധുക്കളുടെ സാമീപ്യവും അര്‍ച്ചനയുടെ ഓര്‍മശക്തി വീണ്ടെടുക്കാന്‍ സഹായിക്കുമെന്ന ഡോക്ടര്‍മാരുടെ നിര്‍ദേശത്തെത്തുടര്‍ന്നാണു പത്തു ദിവസത്തേക്കു വീട്ടിലേക്കു മാറ്റിയത്. മംഗളുരു ആശുപത്രിയില്‍ ചികിത്സയില്‍ കഴിയുകയായിരുന്നു. നേരത്തെ എറണാകുളത്തായിരുന്നു ചികിത്സയിലുണ്ടായിരുന്നത്.
അര്‍ച്ചനയ്ക്കു സംസാരിക്കാന്‍ കഴിയുന്നില്ലെങ്കിലും അടുത്ത ബന്ധുക്കളെയും അയല്‍വാസികളെയും ഒരുപക്ഷെ തിരിച്ചറിഞ്ഞേക്കുമെന്ന ഡോക്ടര്‍മാരുടെ നിര്‍ദേശത്തെ തുടര്‍ന്നാണ് വീട്ടിലെ അന്തരീക്ഷവുമായി പൊരുത്തപ്പെട്ട് പോകുന്നതിനായി ഇവിടേക്കെത്തിച്ചത്. കഴിഞ്ഞ മാര്‍ച്ച് 26ന് അവധിക്കാലം ആഘോഷിക്കാനാണ് അര്‍ച്ചനയും മക്കളും ഗള്‍ഫിലെത്തിയത്.
ഏപ്രില്‍ ആറിനു റാസല്‍ഖൈമ കെ.എഫ്.സി.ക്ക് മുന്നില്‍ ഭര്‍ത്താവ് ശശിധരനും മക്കളായ ശശിനക്കും അശ്വജിത്തിനുമൊപ്പം റോഡ് മുറിച്ച് കടക്കുമ്പോഴാണ് വാഹനം തട്ടി അര്‍ച്ചനക്ക് ഗുരുതരമായി പരുക്കേറ്റത്.
റാസല്‍ഖൈമയില്‍ മാസങ്ങളോളം ചികിത്സയില്‍ കഴിഞ്ഞ ശേഷം മെയ് ഒന്നിന് അര്‍ച്ചനയെ കൊച്ചിയിലെ അമൃത ആശുപത്രിയിലേക്കു മാറ്റി.
വിമാനത്തില്‍ പ്രത്യേക സൗകര്യങ്ങള്‍ ഒരുക്കിയാണ് കൊച്ചിയിലേക്കു കൊണ്ടുവന്നത്. ഇവിടെ നിന്നു ഓഗസ്റ്റ് നാലിനാണ് മംഗളൂരുവിലെ ഫസ്റ്റ് ന്യൂറോ ആശുപത്രിയിലേക്ക് മാറ്റിയത്.
ന്യൂറോ വിദഗ്ധന്‍ ഡോ.ജിയോബര്‍ ലോബോയുടെ നേതൃത്വത്തിലാണ് അര്‍ച്ചനയെ ചികിത്സിക്കുന്നത്. ചികിത്സയ്ക്കു ഭീമമായ തുക ആവശ്യമായതിനാല്‍ നാട്ടുകാരുടെ കൂട്ടായ്മയും സഹായത്തിനായി മുന്‍പന്തിയിലുണ്ട്.