തൃശൂര്‍ : മണ്ണുത്തി ഗവണ്‍മെന്റ് വെറ്ററിനറി കോളജ് ഹോസ്റ്റല്‍ കെട്ടിടത്തിന്റെ ജനാലകളില്‍ തുറക്കാനും അടയ്ക്കാനും കഴിയുന്ന മെറ്റല്‍ കൊതുകുവല സ്ഥാപിക്കണമെന്ന് സംസ്ഥാന മനുഷ്യാവകാശ കമ്മീഷന്‍. കൊതുക് നിര്‍മാര്‍ജനത്തിന്റെ ഭാഗമായി പൊന്തക്കാടുകള്‍ വെട്ടിത്തെളിച്ച് ആവശ്യമായ ശുചീകരണ പ്രവര്‍ത്തനങ്ങള്‍ നടത്തണമെന്നും കമ്മീഷന്‍ ആക്റ്റിംഗ് അധ്യക്ഷന്‍ പി.മോഹനദാസ് നിര്‍ദേശിച്ചു.
കൊതുക് നിവാരണത്തിനായി ഹോസ്റ്റല്‍ പരിസരത്ത് ഫോഗിംഗ് നടത്തണമെന്നും കമ്മീഷന്‍ കോളജ് ഡീനിന് നിര്‍ദേശം നല്‍കി. ഹോസ്റ്റലില്‍ താമസിച്ച് പഠിക്കുന്ന ഒരു വിദ്യാര്‍ഥിയുടെ പിതാവ് നല്‍കിയ പരാതിയിലാണ് നടപടി. ഡെങ്കി, ചിക്കന്‍ഗുനിയ രോഗങ്ങള്‍ വരാതിരിക്കാന്‍ ഹോസ്റ്റലില്‍ കൊതുകുവല സ്ഥാപിക്കണമെന്ന് ആവശ്യപ്പെട്ടാണ് പരാതി നല്‍കിയത്.
കൊതുക് ശല്യം അവസാനിപ്പിക്കാന്‍ ശുചീകരണപ്രവര്‍ത്തനങ്ങള്‍ നടത്താറുണ്ടെന്ന് വെറ്റിനറി കോളജ് അഡ്മിനിസ്‌ട്രേറ്റീവ് ഓഫീസര്‍ കമ്മീഷനെ അറിയിച്ചു. കൊതുകുവല സ്ഥാപിക്കണമെന്ന ആവശ്യം മതിയായ ഫണ്ട് ലഭിക്കുമ്പോള്‍ നടപ്പിലാക്കുമെന്ന് റിപ്പോര്‍ട്ടില്‍ പറയുന്നു. മഴക്കാലത്ത് കൊതുകുജന്യരോഗങ്ങള്‍ക്ക് സാധ്യതയുള്ളതിനാല്‍ പരാതിയിലെ ആവശ്യം ഹോസ്റ്റല്‍ അധികൃതര്‍ അടിയന്തിരമായി പരിഹരിക്കണമെന്ന് കമ്മീഷന്‍ ആവശ്യപ്പെട്ടു.