കൊച്ചി: ആലുവയില്‍ ബസിടിച്ച് സ്‌കൂട്ടര്‍ യാത്രക്കാരിയായ യുവതി മരിച്ചു. ആലുവ മുപ്പത്തടം സ്വദേശി അനില ഡോളി(21) ആണ് മരിച്ചത്.

ഇന്ന് രാവിലെ ആലുവ സെന്റ് അലോഷ്യസ് കോളജിന് മുന്നില്‍ വച്ചായിരുന്നു അപകടം. അനില പിതാവ് ജെറോച്ചനൊപ്പം സ്‌കൂട്ടറില്‍ സഞ്ചരിക്കുമ്പോള്‍ പിന്നില്‍ സ്വകാര്യ ബസ് ഇടിക്കുകയായിരുന്നു. റോഡിലേക്ക് തെറിച്ചു വീണ അനിലയെ ഗുരുതര പരുക്കുകളോടെ ആശുപത്രിയില്‍ പ്രവേശിപ്പിച്ചെങ്കിലും രക്ഷിക്കാനായില്ല.

പിതാവ് ജെറോച്ചനെ നിസ്സാര പരുക്കുകളോടെ ആശുപത്രിയില്‍ പ്രവേശിപ്പിച്ചിരിക്കുകയാണ്. ബസ് ഡ്രൈവര്‍ റോഡിലെ കുഴി വെട്ടിക്കാന്‍ തിരിച്ചപ്പോള്‍ സ്‌കൂട്ടറിലിടിക്കുകയായിരുന്നു. ഫൈഡറല്‍ ബാങ്ക് തിരൂര്‍ ശാഖയിലെ ജീവനക്കാരിയാണ് മരിച്ച അനില.