റിയോ ഡി ജനീറോ: പുരുഷന്‍മാരുടെ 85 കിലോ വിഭാഗം ഭാരോദ്വഹനത്തില്‍ ഇറാന്റെ കൈനോഷ് റൊസ്റ്റാമിക്ക് ലോക റെക്കോര്‍ഡോടെ സ്വര്‍ണം. ഇറാന്‍ റിയോയില്‍ നേടുന്ന ആദ്യ മെഡല്‍ കൂടിയാണ് റൊസ്റ്റാമി സുവര്‍ണ നേട്ടത്തിലൂടെ സാധ്യമാക്കിയത്. സ്വന്തം ലോക റെക്കോര്‍ഡാണ് ക്ലീന്‍ ആന്‍ഡ് ജെര്‍ക്കില്‍ 217 കിലോയും മൊത്തം 396 കിലോ ഭാരവും ഉയര്‍ത്തി റൊസ്റ്റാമി തിരുത്തിയത്. ചൈനയുടെ ടിയാന്‍ താവോ 395 കിലോ ഉയര്‍ത്തി വെള്ളിയും റൊമാനിയയുടെ ഗബ്രിയേല്‍ സിന്‍ക്രായിയന്‍ 390 കിലോയും ഉയര്‍ത്തി വെങ്കലവും നേടി. മത്സരത്തിലുടനീളം കത്തുന്ന ആത്മവിശ്വാസവുമായാണ് റൊസ്റ്റാമി ഭാരം ഉയര്‍ത്തിയത്. 2012 ലെ ലണ്ടന്‍ ഒളിംപിക്‌സില്‍ ഇതേ വിഭാഗത്തില്‍ വെങ്കലം നേടിയ ഇറാന്‍ താരം ഇത്തവണ സുവര്‍ണ നേട്ടമാക്കി മാറ്റി.